Ռուսաստանի Դաշնության արտգործնախարարության պաշտոնական ներկայացուցիչ Մարիա Զախարովան մեկնաբանել է 1990-ականների չեչենական անջատողական շարժման առաջնորդ Ջոհար Դուդաևի արձանը Թուրքիայում բացելու փաստը՝ ընդգծելով Ռուսաստանի սկզբունքային դիրքորոշումը ահաբեկիչների հուշարձանների վերաբերյալ: Այդ մասին հայտնում է «ՌԻԱ Նովոստի» գործակալության հաղորդագրությունը:
«Դուք գիտեք մեր սկզբունքային դիրքորոշումը ծայրահեղականների, ահաբեկիչների, զինյալների և կոլաբորացիոնիստների հիշատակին ցանկացած տեսակի հուշարձանների տեղադրման վերաբերյալ: Այդ մոտեցումը անփոփոխ է, սկզբունքային և վերաբերում է աշխարհի ցանկացած երկրի ու կետի», – ճեպազրույցի ընթացքում ասել է Զախարովան:
Ավելի վաղ թուրքական TRT հեռուստաալիքը հայտնել էր Թուրքիայի Քոջայելի մարզի Քյորֆեզ քաղաքում Ջոհար Դուդաևի անունով պուրակ բացելու մասին: Ընդ որում, տեղական իշխանությունները Դուդաևին անվանել էին «ազատության համար պայքարի խորհրդանիշ»:
Ըստ «ՌԻԱ Նովոստի»-ի՝ Ջոհար Դուդաևը Չեչնիայում անջատողական շարժման առաջնորդն է եղել, որը հանդես էր գալիս Ռուսաստանից Չեչնիայի անջատման օգտին և ղեկավարում էր ռուսաստանյան դաշնային ուժերի դեմ ռազմական գործողությունները: Դուդաևը սպանվել է 1996 թ. ապրիլի 21-ին չեչենական Գեղի-Չու գյուղում:
