Այսօր լրագրողների հետ զրույցում ՀՀ ԱԳ նախկին նախարար Արա Այվազյանը, պատասխանելով հարցին՝ արդյո՞ք «3+2» ֆորմատը կարող է խանգարել Արցախյան հարցի կարգավորմանը, Մինսկի խմբի աշխատանքին, ասաց՝ պաշտոնական Երևանի կողմից հայտարարվում է, որ «3+2» ֆոմատը չպետք է կրկնի այն գործառույթները, որոնք կան այլ ֆորմատներում․ «Բայց մեզ քաջ հայտնի է, թե՛ Անկարայի, թե՛ Բաքվի հայտարարություններն ու նպատակները։ Ես մտավախություն ունեմ, որ այս ֆորմատը կարող է չեզոքացնել ու ստվերել ԵԱՀԿ ՄԽ համանախագահների ֆորմատը։ Վստահ եմ, որ մեր գործընկերները դա շատ լավ հաշվարկում են»։
Լրագրողներից մեկը նախարարին հիշեցրեց, որ Թուրքիան ու Ադրբեջանը մշտապես նախապայմաններ են առաջ քաշում՝ հարցնելով՝ այս փուլում մենք կկարողանա՞նք առանց մեր կողմից նախապայմանների Թուրքիայի հետ հարաբերություններ կարգավորել, ասաց, որ իր նախարար եղած ժամանակ ասում էր՝ խոսքեր լսելու ժամանակն անցել է, Երևանը սպասում է պաշտոնական Անկարայի դրական քայլերին․ «Ցավոք սրտի, մենք ոչ թե դրական քայլեր ենք տեսնում, այլ շարունակական պահանջներ ու ոչ բարիդրացիական հարաբերություններին բնորոշ քայլեր։ Դրա համար ես բավական տարակուսած եմ ու կասկած ունեմ, թե ինչ նպատակ է հետապնդում այս «3+2» ֆորմատը»։