Վերլուծաբան Հակոբ Բադալյանը ֆեյսբուքյան իր էջում գրել է.
Վարչապետ Փաշինյանի գրառումը հետաքրքրել ու հարցեր առաջացրել է շատ շատերի մոտ: Տարբեր են գրառման վերաբերյալ կարծիքներն ու մեկնաբանությունները, թե ինչ կար տողատակում կամ ինչ էր ակնարկում, ինչ ազդակ էր հղում Նիկոլ Փաշինյանը:
Հայաստանի դեմ վարվող հիբրիդային պատերազմի հանգամանքը այն է, ինչի ամենատարբեր ասպեկտների մասին անձամբ ինքս գրում եմ տասնամյակից ավելի: Այն ժամանակ, երբ գրեթե ոչ ոք չէր խոսում կամ գրում այդ հարցերի մասին: Դրա համար տեւական ժամանակ թիրախավորվել եմ նաեւ անհատապես: Բայց դրա մասին չէ, որ ուզում եմ խոսել: Այս հանգամանքը պարզապես մատնանշեցի արձանագրելու համար, որ այդ թեման ավելի քան տասնամյակ եղել է իմ լրագրողա-մեկնաբանական աշխատանքի հիմնական առարկան, ամենատարբեր ինֆորմացիոն առիթների, քաղաքական իրադարձությունների, երեւույթների բերումով:
Փաշինյանի արձանագրումը՝ հիբրիդային պատերազմ, թերեւս ունի առանձին որոշակի անդրադարձի կարիք զուտ քաղաքական ասպեկտով:
Ընդհանուր առմամբ, գրառումը, իմ սուբյեկտիվ կարծիքով, Հայաստանում իշխանության խնդրի մասին է: Մատալուտ, թե «էքզիստենցիալ» իմաստով, շատ բարդ է ասել: Դարձյալ, իմ սուբյեկտիվ գնահատմամբ հարցը ավելի շուտ երկարաժամկետ է: Թավշյա հեղափոխությունից հետո մի շարք հոդվածներում եւ հարցազրույցներում պարբերաբար խոսել եմ Հայաստանում լեգիտիմ իշխանափոխության խնդրի առկայության մասին: Լեգիտիմ իշխանափոխության հնարավորությունը մեր տիպի պետությունների համար արտաքին-անվտանգային քաղաքականության կարեւորագույն միջոց է: Թավշյա հեղափոխությունից հետո Հայաստանում առաջացել է այդ խնդրը, որովհետեւ կա լեգիտիմ իշխանություն, չկա համարժեք լեգիտիմությամբ ընդդիմություն: Սրա պատճառներն օբյեկտիվ են ու սուբյեկտիվ, բայց դրանից խնդիրը չի փոխվում:
Ինչ ունենք այսօր: Ունենք մի վիճակ, երբ ընդդիմությունն է իր ոչ լեգիտիմությամբ, գործող իշխանության լեգիտիմության հիմնական աղբյուրը: Բառացիորեն նախօրեին մեկնաբանություն գրեցի այս խնդրի վերաբերյալ, որ միայն լեգիտիմ իշխանությամբ պետությունը կարող է ճկուն լինել կարճ ժամանակահատվածի համար, մինչդեռ Հայաստանի դեմ հիբրիդային պատերազմը շարունակվելու է դեռ երկար, որովհետեւ դեռ երկար է շարունակվելու հիբրիդային «երրորդ համաշխարհային պատերազմը»: Ըստ այդմ, Հայաստանի համար կենսական խնդիր է լեգիտիմ իշխանությանը զուգահեռ համարժեք լեգիտիմությամբ ընդդիմության գոյությունը:
Սա Հայաստանի իշխանության հարց է, իմ տպավորությամբ Փաշինյանը սկսում է շոշափել այդ հարցը, որովհետեւ թերեւս ինքն է ամենից լավ պատկերացնում խնդիրների ու սպառնալիքների ամբողջ ծավալը եւ միայն լեգիտիմ իշխանությամբ դրան դիմագրավելու սահմանափակ ժամանակը: