Առողջապահության նախարարի առաջին տեղակալ Լենա Նանուշյանի գլխավորած պատվիրակությունը եռօրյա այցով Սանկտ-Պետերբուրգում է: Հայտնում է ՀՀ Առողջապահության նախարարությունը։
ՌԴ սպառողների իրավունքների և մարդու բարեկեցության պաշտպանության ոլորտում վերահսկողության դաշնային ծառայությունը (Ռոսպոտրեբնադզոր) կազմակերպել է նոր կորոնավիրուսային համավարակի և այլ վարակիչ հիվանդությունների հակազդման հարցերին նվիրված միջազգային գիտագործնական համաժողով, որին մասնակցում են առողջապահության նախարարի առաջին տեղակալ Լենա Նանուշյանը, ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցը և ՀՀ ԳԱԱ Մոլեկուլային կենսաբանության ինստիտուտի տնօրեն Արսեն Առաքելյանը, ինչպես նաև համապատասխան պետական մարմինների ղեկավարների, ԱՊՀ անդամ-պետությունների, Աֆրիկայի, Ասիայի երկրների գիտագործնական կազմակերպությունների ներկայացուցիչները:
Մասնակիցները համաժողովին քննարկել են հետևյալ թեմաները.
- Նոր կորոնավիրուսային վարակի համաճարակաբանություն: Հակահամաճարակային միջոցառումներ: Արձագանք:
- COVID-19 համավարակի դեմ պայքարի ոլորտում միջազգային համագործակցության փորձ:
- COVID-19. մարտահրավեր ժամանակակից գիտությանը:
- Ջանքերի միավորում. միջազգային փոխգործակցություն COVID-19-ի հակազդման շրջանակներում:
- SARS-CoV-2-ի էվոլյուցիա:
- SARS-CoV-2-ի էվոլյուցիայի ազդեցությունը COVID-19 համավարակի վրա: Կանխատեսումներն ու տարածման ձևերը:
- COVID-19-ի ախտորոշում. խնդիրներն ու լուծումները:
- COVID-19. գլոբալ մարտահրավերներն ու ժամանակակից տեխնոլոգիաները:
- Պատվաստանյութեր. ներկան ու ապագան: «SARS-CoV-2»-ի էվոլյուցիայի մրցավազք:
- COVID-19-ի ժամանակ իմունային արձագանքի ձևավորման առանձնահատկություններ:
- COVID-19-ի իմունոլոգիա. իմունային արձագանքման առանձնահատկություններից մինչև հավաքական իմունիտետ:
Միջոցառման շրջանակներում տեղի է ունեցել նաև ԵԱՏՄ մասնակից-պետությունների գլխավոր սանիտարական բժիշկների Խորհրդի անդամների հանդիպում, որի ընթացքում քննարկվել են պետությունների տարածքներում ընդհանուր համաճարակային իրավիճակը, COVID-19 դեմ պայքարի և կանխարգելման ուղղությամբ իրականացվող աշխատանքները, ինչպես նաև հետագա անելիքները և համագործակցության ուղղությունները։
Մասնավորապես, համավարակի դեմ պայքարի գործում ակտիվ և արդյունավետ փոխգործակցություն է ծավալվել Ռուստանի Դաշնության հետ։ ՌԴ սպառողների իրավունքների և մարդու բարեկեցության պաշտպանության ոլորտում վերահսկողության դաշնային ծառայության ղեկավար, ԵՏՄ անդամ-պետությունների գլխավոր սանիտարական բժիշկների Խորհրդի նախագահ Ա․ Պոպովայի հետ հանդիպման ժամանակ ընդգծվել է վերոհիշյալ համագործակցության կարևորությունը, ինչպես նաև այն խորացնելու նպատակով ձեռք են բերվել նոր պայմանավորվածություններ։
