«Առաջին լրատվական»-ի տեղեկություններով՝ Աբովյանում ՀՅԴ-ն հրաժարվել է ԲՀԿ-ի հետ կոալիցիա կազմել։ Տեղեկությունը փորձեցինք ճշտել ԲՀԿ-ից: ԲՀԿ-ական նախկին պատգամավոր Արման Աբովյանը «Առաջին լրատվական»-ի հետ զրույցում նշեց, որ այս մասով որևէ բան չի կարող ասել, քանի որ չունի տեղեկություն:
Հարցին, թե այս պահին կա՞ն արդյոք բանակցություններ, նա պատասխանեց. «Այս պահին զերծ կմնան ինչ-որ բաներ խոսել, բայց ՔՊ-ի հետ ոչ, մենք ի սկզբանե ասել ենք, որ ՔՊ-ի հետ չենք համագործակցի»:
Բանն այն է, որ Աբովյանում ՏԻՄ ընտրություններում թեև հաղթանակ է տարել ԲՀԿ-ն՝ Էդուարդ Բաբայանի գլխավորությամբ, սակայն նրա ստացած 46,1 տոկոսը թույլ չի տալիս ԲՀԿ-ին միանձնյա իշխանություն ձևավորել:
Երկրորդ տեղում ՔՊ-ն է, որն ստացել է 37 տոկոս ձայն, երրորդ տեղում «Հանրապետություն» կուսակցությունն է՝ 12 տոկոսով և ՀՅԴ-ն՝ 5,1 տոկոսով:
Այստեղ ինտրիգը պահպանվում է. եթե ՀՅԴ-ն միավորվի ԲՀԿ-ի հետ, ապա Բաբայանի հաղթանակն ապահովված կլինի, քանի որ այդ երկու ուժերը միասին ստանում են 51,2 տոկոս: Իսկ ՔՊ-ի ու «Հանրապետության» միավորումը բավարար չէ 50 տոկոսին հասնելու համար: Նրանք միասին ստացել են 49 տոկոս ձայն:
