Վանաձորի նախկին քաղաքապետ Սամվել Դարբինյանը, ում հեղափոխությունից հետո մեղադրանք առաջադրվեց համայնքին շուրջ 60 մլն դրամի վնաս պատճառելու համար, կարող է ամբողջովին ազատվել վիճահարույց տարածքները քաղաքին վերադարձնելու պատասխանատվությունից։
Բանն այն է, որ թեև դատախազությունը շարունակում է պնդել, որ ավելի քան մեկ տարվա քննությունն ապացուցել է, որ Դարբինյանը իշխանության տարիներին Վանաձորի կենտրոնական տարածքները յուրայիններին է հանձնել չնչին գներով, այսօր նա այլևս մեղադրյալ չէ, քանի որ անցել է մեղսագրվող հանցագործության վաղեմության ժամկետը։
Փաստացի, օրենքով ևս մեկ լծակ կա՝ այդ տարածքները Վանաձորին վերադարձնելու համար․ քաղաքապետարանը պետք է հայց ներկայացնի քաղաքացիական դատարան վնասը վերականգնելու պահանջով։ Անցած կիրակի Վանաձորում ձևավորված նոր իշխանությունը դրա համար ընդամենը մեկ ամիս ունի։
Այս առնչությամբ «Առաջին լրատվական»-ը փորձեց մեկնաբանություն ստանալ հենց իրենից՝ Վանաձորի նախկին քաղաքապետ Սամվել Դարբինյանից: Վերջինս հայտարարեց, որ այս ամենը հորինվածք է. «Նման բան չկա, դրանք հեքիաթներ են»,-ասաց նա ու դրել լսափողը:
Վանաձորի նախկին քաղաքապետներից Մամիկոն Ասլանյանը, ով նորից վերընտրվել է այդ պաշտոնում, «Առաջին լրատվական»-ի հետ զրույցում նախ կատակով նկատեց, որ մեղադրվող այդ «նախկին քաղաքապետը» ինքը չէ, ապա շարունակեց. «Տարբեր քրեական գործերի մասին զրույցներ, հրապարակումներ եղել են, բայց կոնկրետ գործընթաց, դատական ակտ, հարկադիր կատարում, որևէ նման բան իմ օրոք գոնե չի եղել: Որ առարկայական վճիռ կա իրացման կամ կատարման ենթակա, ես որևէ նման գործից տեղյակ չեմ:
Ի դեպ, միակ մարդը, որ հող է վերադարձրել համայնքին, եղել եմ ես: Արցախի պուրակի հողը հետգնում արեցինք և վերադարձրեցինք համայնքին: Իրենք վճարած գումարը չեկերով ներկայացրեցին, մենք ավագանու նիստում որոշում կայացրեցինք, էդ մարդկանց գումարը հետ տվեցինք, հողը մնաց համայնքին ու հիմա այգի է կառուցվել»:
Ինչ վերաբերում է նրան, որ ՏԻՄ ընտրություններից հետո «Մամիկոն Ասլանյան» դաշինքը չի ստացել ձայների 50 տոկոսից ավելին և չի կարող միանձնյա ստանձնել համայնքի կառավարումը, պետք է կոալիցիա կազմի ավագանու կազմում ընտրված այլ ուժերի հետ, նա ասաց. «Նախ, պետք է սպասել արդյունքների պաշտոնական հրապարակմանը: Ես ասել եմ, որ քաղաքական այլ տրամաչափի գործունեություն չեմ ծավալում, համայնքային է մեր գործունեությունը:
Կմտնենք ավագանու նիստին, քվեարկությունը կլինի, աշխատանքային պրոցեսում արդեն կտեսնենք՝ որ ուժերի կամ ավագանու որ անդամների հետ ենք ինչ ֆորմատով համագործակցում: Այս պահին որև քաղաքական կամ իրավական թուղթ, հուշագիր չի կարող լինել»: