Հայաստանում ԱՄՆ դեսպանատունը հայտարարությամբ անդրադարձել է Հայաստանում տեղի ունեցած ՏԻՄ ընտրությանը: Սա ինքնին բավականին հետաքրքիր հանգամանք է, որ վկայում է ՏԻՄ ընտրության որոշակի ավելի լայն քաղաքական նշանակության մասին, քան բխում է հենց բուն ՏԻՄ աստիճանից կամ մակարդակից: ԱՄՆ դեսպանատունը գնահատել է ընտրությունը, այն որակելով որպես հայ ժողովրդի ժողովրդավարական տոկունության, ժողովրդավարության ճանապարհով ընթացքի վկայություն, արձանագրելով մրցակցային բազմազանությունը, միաժամանակ կոչ անելով հետամուտ լինել տարբեր ընդդիմադիր թեկնածուների հանդեպ հետապնդումների մասին տեղեկություններին:
ԱՄՆ դեսպանատան արձագանքը անշուշտ ՏԻմ ընտրության ավելի լայն քաղաքական նշանակության ազդակ է, որը իհարկե պետք չէ նաև առանձնապես գերագնահատել: Այդուհանդերձ, դեսպանության մակարդակով ՏԻՄ ընտրության անդրադարձը նաև խոսում է թերևս Հայաստանին ուղղված ազդակների մասին, որոնք խորքային առումով վերաբերում են քաղաքական ռեֆորմացիային: Ինչո՞վ է աչքի ընկել ՏԻՄ ընտրական գործընթացը: Նրանով, որ այն չի արտապատկերել խորհրդարանի արտահերթ ընտրության նախընտրական գործընթացի հարաբերակցությունն ու բովանդակությունը: Դա ամենևին չի նշանակում, որ ՏԻՄ ընտրությունն անցել է որակապես այլ մակարդակում: Այդուհանդերձ ակնառու է, որ ՏԻՄ ընտրությանը չի եղել նախկին-ներկա տրամաբանության շուրջ գերկենտրոնացված ընտրություն և քաղաքական գործընթացում մրցակցային մասնակցություն են ունեցել նաև այլ ուժեր: Սա չի նշանակում, որ այդ ուժերի մի զգալի մասը չի եղել նախկին համակարգի պարզապես այլ փաթեթավորում:
Անկասկած եղել է, սակայն բոլոր դեպքերում ակնառու է, որ ի տարբերություն համապետական մակարդակի ընտրության, ՏԻՄ ընտրությունն անցել է անհամեմատ առավել բազմաշերտ տրամաբանության ներքո: Այն, ինչին պետք է ձգտի Հայաստանի հասարակական-քաղաքական միջավայրն ընդհանրապես՝ բազմաշերտություն, որի միջոցով պետք է փորձել հարթել քաղաքական բովանդակային, ծրագրային-գաղափարական պայքարի ճանապարհը, ձգտելով քայլ առ քայլ և հետևողականորեն դուրս բերել Հայաստանի հասարակական-քաղաքական կյանքը «նախկին-ներկա» սահմանափակ և ըստ էության տեղապտույտ հիշեցնող տրամաբանությունից: Դրանից է կախված նաև Հայաստանի արտաքին-քաղաքական և անվտանգային դիմադրունակության հեռանկարը:
