Հայտարարեք, թե երբ է բացվելու «Զանգեզուրի միջանցքը» և խնդիրներ չեն լինի, երեկ Ղուբայի շրջան կատարած այցի ժամանակ հայտարարել է Բաքվի ղեկավար Ալիևը: Նա համեմատություն է անցկացրել պատերազմի հետ, ասելով, որ իրենք կանգ առան այն ժամանակ, երբ հստակ պայմանավորվածություն է եղել, թե հայկական ուժերը երբ են թողնում իրենց տարածքները: Սոչիի եռակողմ հանդիպմանը բավականին հեզ ու խոնարհ Ալիևը օրեր առանց հանկարծ վերստին անցնում է մարտաշունչ տրամաբանության ու հռետորաբանությամբ, կրկին խոսում ինչ-որ «միջանցքի» մասին, այն դեպքում, երբ Սոչիում խոսում էր տրանսպորտային երակների մասին: Ի՞նչ պատահեց Ալիևին: Ի դեպ, հարկ է նկատել, որ դրան զուգահեռ Ադրբեջանը տապալեց նաև ԵԱՀԿ Մինսկի խմբի համանախագահների հովանու ներքո Հայաստանի և Ադրբեջանի արտգործնախարարների հանդիպումը:
Մինչ այդ, փաստացի խնդիրներ առաջացան նաև Սոչիի պայմանավորվածությունների շարունակության իմաստով, երբ փոխվարչապետների մակարդակով հանդիպումը Մոսկվայում չունեցավ արդյունք: Այդպիսով, ի՞նչ է պատահել և ինչո՞ւ է Ադրբեջանի նախագահն «աքլոր» կտրում և վերստին անցնում վերջնագրային հռետորաբանության: Ընդ որում, հարկ է նկատել, որ դա տեղի է ունենում Թուրքիայի նախագահ Էրդողանի և ՌԴ նախագահ Պուտինի հեռախոսազրույցից հետո, որ կայացավ դեկտեմբերի 3-ին: Սոչիի հանդիպման առնչությամբ թուրքական դժգոհությունը նկատվեց անմիջապես՝ սեպտեմբերի 28-ին Էրդողանը շտապեց Աշխաբադ Իրանի նախագահ Ռայիսի հետ հանդիպման: Նաև կնքվեց թուրքմենական գազն Իրանի միջոցով Ադրբեջան արտահանելու համաձայնագիր, ինչն ակնհայտորեն Ռուսաստանի հանդեպ առնվազն մրցակցային քայլ էր դեպի Եվրոպա էներգակիրների արտահանման առումով:
Թուրքիային չի գոհացնում այն, որ Ռուսաստանը կարող է խոսել «3+3»-ին համաձայն լինելու, դա արագացնելու մասին, բայց իրականում փորձի արագացնել 3-ի ձևաչափով պայմանավորվածությունների գործընթացը: Առավել ևս, որ Անկարան նկատում է նաև այլ պայմանավորվածություններ, օրինակ Բրյուսելի հետ: Շարլ Միշելը Բրյուսելում Փաշինյան-Ալիև հանդիպում կազմակերպելու հարցում խորհրդակցել է Պուտինի, բայց ոչ իր՝ Էրդողանի հետ, որը Անկարայում անհարմար դրության մեջ դրեց Միշելին և նրա հետ ամիսներ առաջ Թուրքիա այցելած Եվրահանձնաժողովի նախագահ ֆոն Դեր Լյաենին՝ աթոռ չտալով տիկնոջը: Էրդողանն ըստ երևույթին ձեռնմուխ է եղել Սոչիի և Բրյուսելի տապալմանը: Դա իհարկե բավականին ռիսկային խաղ է նաև Ալիևի համար, մյուս կողմից սակայն վերջինս փորձել և փորձում է օգտագործել Թուրքիան, որպեսզի խափանի որևէ քաղաքական կայուն գործընթացի ձևավորում, ինչը Ադրբեջանին կսահմանափակի շանտաժի քաղաքականության հարցում: Ինչ կարող է անել այդ իրավիճակում Ռուսաստանը, երևի թե զգալիորեն պայմանավորված կլինի այն հանգամանքից, թե ինչպես կընթանա Բայդեն-Պուտին տեսավեհաժողովը, որ տեղի կունենա դեկտեմբերի 7-ի երեկոյան: Հայաստանին այս իրավիճակում չի մնում այլ բան, քան լինել պատրաստ իրավիճակի ընդհուպ ամենաանցանկալի զարգացումների, առնվազն այդպիսիք կանխելու համար: Նախօրեին վարչապետ Նիկոլ Փաշինյանն անցկացրել է Անվտանգության խորհրդի նիստ, ընդ որում ընդլայնված կազմով:
