«Առաջին լրատվական»-ի հարցերին պատասխանել է ԱԺ «Քաղաքացիական պայմանագիր» խմբակցության պատգամավոր, պաշտպանության նախկին փոխնախարար Գագիկ Մելքոնյանը
Սամվել Բաբայանն իր հարցազրույցում նշել է, որ բանակը լճացած վիճակում է և որ վերջին մեկ տարում որևէ փոփոխություն չի եղել բանակում: Ինչպե՞ս եք գնահատում այս հայտարարությունները:
Վարչապետն էլ է ասել, բոլոր իշխանավորներն էլ ասել են, որ բանակում տեղի են ունենում վերափոխումներ, այդ թվում կադրային առումով, որը այնքան էլ արտահայտված չէ: Բանակի կազմը պետք է փոփոխվի, այդ ուղղությամբ աշխատանքներ տարվում են: Բայց ինձ էլ է թվում, որ դանդաղում է այդ գործընթացը, մենք կանգնած ենք պատերազմի առաջ, նույնիսկ պատերազմի մեջ և բարեփոխումների տեմպերը պետք է արագանան:
Սամվել Բաբայանը վստահություն է հայտնել, որ գործող Գլխավոր շտաբով հնարավոր չէ որևէ բարեփոխում իրականացնել և պաշտպանության նախարարի փոփոխությունը որևէ լուրջ ազդեցություն այս գործըընթացի վրա չի ունենա: Ինչու ԳՇ-ում այդ փոփոխությունները տեղի չեն ունենում:
Դա մեզնից չի կախված, ես չգիտեմ՝ ինչու դա տեղի չի ունենում: Զորքը պատկանում է գլխավոր շտաբին, շտաբը պետք է արագացնի այդ բարեփոխումների ծրագիրը: Օր առաջ դա պետք է իրականացվի: Մենք քննարկումներ ենք անցկացնում այստեղ, ԳՇ-ից գալիս են պաշտոնյաներ, որոնք ներկայացնում են իրավիճակը: Այդ ամենն արվում է: Սամվել Բաբայանն իրենց հետ կապ չունի, բայց մենք կապ ունենք: Մենք էլ ենք նկատում, որ բարեփոխումները դանդաղում է և իրենց ասում ենք, որ պետք է արագ արվի այդ ամենը: Նույնիսկ վերջերս քննարկումներ ունեցանք աշխարհազորի հետ կապված և իրենք էլի մեկ ամիս ժամանակ խնդրեցին, որպեսզի մանրամասն քննարկեն, նոր առաջարկություններ ներկայացվեն: Բոլոր օղակներում այդ քննարկումները ընթանում են: Ես լրիվ համամիտ եմ, որ դանդաղում է գործընթացը:
Այսինքն դուք նաև համամիտ եք, որ բանակը լճացե՞լ է:
Ամեն մարդ էլ կարող է իր կարծիքն ասել: Սամվել Բաբայանն իր կարծիքն է ասում: Ես չեմ կարող որևէ մեկին ասել՝ կարծիք մի հայտնի: Իսկ ես շփվում են ԳՇ պաշտոնյաների հետ, և վստահեցնում եմ, որ աշխատանքներ գնում են, պարզապես դանդաղում են:
Նույն Սամվել Բաբայանը հայտարարել է, որ ՀԱՊԿ-ից դուրս գալու հնարավորությունը Երևանը պետք է դիտարկի և հստակեցնի իր պայմանագրային պայմանավորվածությունները Ռուսաստանի հետ: Այս մասով ո՞րն է լինելու մեր անելիքը, և ինչ կարծիք ունեք այս գնահատականների վերաբերյալ:
Ես գիտեմ, որ մեր երկրի իշխանությունները նմանատիպ կարծիք չեն հայտնել և որևէ մեկը չի ասել՝ ՀԱՊԿ-ից դուրս ենք գալիս: Ես նման բան չեմ լսել իշխանություններից, իսկ փողոցում ով ինչ ասես, կարող է ասել: Ե իշխանությունը ցանկություն ունենա ՀԱՊԿ-ից դուրս գալու, նա հրապարակային կհայտարարի այդ մասին: Բայց որ ՀԱՊԿ-ն այն կառույցն է, որը միայն թղթի վրա է, բոլորս էլ համոզվել ենք այս ընթացքում: Մենք դիմեցինք ՀԱՊԿ-ին, ահագին ժամանակ քննարկեց-քննարկեց, հետո ասաց՝ մեզ պետք է 4-րդ կետով դիմեիր, ոչ թե 2-րդ կետով: Այսինքն մենք մեր կաշվի վրա զգացել ենք՝ ինչ է ՀԱՊԿ-ը: Այդուհանդերձ, մենք ՀԱՊԿ-ից դուրս գալու առաջարկ չենք արել:
Վերջերս տեսանք, որ փոխվարչապետների մակարդակով ևս հնարավոր չեղավ պայմանավորվածություն ձեռք բերել: Ի՞ նչ է տեղի ունենում, Ադրբեջանը պնդում է, որ պետք է միջանցք ստանա, Հայաստանն էլ մերժո՞ւմ է:
Նրանց ուզածը միջանցքն է: Եթե հիշում եք նախագահների մակարդակով հավաքվեցին Կազանում, պայմանավորվեցին, բայց վերջին պահին Ալիևն ասաց՝ ոչ, նոր պայմաններին էլ կհամաձայնվեք, նոր ես կհամաձայնվեմ: Մի 12 պայման ավելացրեց: Հիմա նույնն է կատարվում: Նոյեմբերի 9-ի հայտարարությունը իրենք չեն կատարել, կամ ո՞ր պայմանավորվածությունն են կատարել, ոչ մեկը: Ու չեն էլ կատարելու: Հիմա գոնե հասկանանք, որ էս մարդիկ ավելի շատ բան են ուզում, իրենց ախորժակը շատ մեծ է: Դրա համար մենք պետք է պահենք մեր երկիրը, իրենց նվեր չենք տալու մեր հայրենիքը:
