«Առաջին լրատվական»–ի զրուցակիցն է Արցախի Ֆինանսաբյուջետային և տնտեսական կառավարման հարցերի մշտական հանձնաժողովի նախագահ Արթուր Հարությունյանը։
-Պարոն Հարությունյան, Արցախի խորհրդարանը քննարկում է 2022թ․ պետական բյուջեի նախագիծը։ Հաշվի առնելով հետպատերազմյան իրողությունները որևէ առանձնահատկություն կա՞։
–Միանշանակ կան առանձնահատկություններ։ Ինչպես նախորդ տարիներին, նաև հիմա՝ բյուջեն ավելի շատ սոցիալական ուղղվածություն ունի և այդ ուղղվածությունը հետպատերազմյան հետևանքները վերացնելուն են ուղղված։ Կան բազմաթիվ սոցիալական ծրագրեր, տնտեսության մեջ ներդրումներ իրականացնելու, խրախուսման ծրագրեր ևս ներառված են։
– Ծախսերը հիմնականում ինչի՞ն են ուղղված լինելու։
-Ինչպես ամեն տարի ծախսերը՝ աշխատավարձեր, թոշակներ, նպաստներ․․ դրան կգումարվի այն սոցիալական ուղղվածություն ունեցող ծախսերը, որոնք ուղղված կլինեն մեղմացնելու պատերազմի հետևանքները։ Դրանք նախատեսվում են նաև տեղահանված բնակիչների համար։
-Եկամուտների հատվածը նախորդ տարվա համեմատ կրճատվե՞լ է։
-Հակառակը՝ 2021 թվականի համեմատ ավելացել է։2022 թվականին կանխատեսվում է 40 միլիարդ։ Այսինքն՝ լինելու են Արցախի Հանրապետության սեփական եկամուտները, մնացածը՝ բյուջետային վարկ։
-Հայաստանի բյուջեի հետ նախագիծն ինչքանո՞վ է սինխրոնացվել, թե՞ ամբողջությամբ առանձին եք մշակել։
-Իհարկե կապված է Հայաստանի հետ, քանի որ բյուջետային վարկը հենց տրամադրվում է Հայաստանի Հանրապետության կողմից։ Ծախսային հատվածի մի մասի գումարները հատկացնում է Հայաստանի պետական բյուջեն։
-Դեռ քվեարկություն չի եղել, իսկ ընդհանուր մթնոլորտն ինչպիսի՞ն է, կա՞ն առարկություններ։
-Այս պահին դեռ հանձնաժողովային քննարկումներ են։ Վաղը վերջին նիստն է լինելու հանձնաժողովում, որից հետո առաջարկությունների ներկայացման փուլն է։ Այնուհետև կլինի առաջին ընթերցում, ընդմիջում, երկրորդ առաջարկությունների ներկայացման փուլ և վերջնական հաստատումը՝ դեկտեմբերի 23-ի լիագումար նիստում։ Այս պահին դեռ քվեարկություն չունենք, բայց ընթացքում բավականին հետաքրքիր քննարկումներ են տեղի ունեցել, նաև առաջարկություններ են հնչել, որոնք բնականաբար քննարկումների արդյունքում կպարզվի՝ տեղ կգտնե՞ն բյուջեում, թե՞ ոչ։