ԵԱՀԿ ՄԻնսկի խմբի երեք համանախագահները հայտարարություն են տարածել Ստոկհոլմում Հայաստանի և Ադրբեջանի նախարարների հանդիպման հետ կապված, ավելի կոնկրետ՝ հանդիպում չկազմակերպելու հետ կապված: Նրանք այդ առիթով հայտնում են իրենց ափսոսանքը, որ չի հաջողվել կազմակերպել այդ հանդիպումը: Ինչպես հայտնի է, մինչ Ստոկհոլմում ԵԱՀԿ նախարարական համաժողովը կար խոսակցություն, որ այնտեղ հնարավոր է Հայաստանի և Ադրբեջանի արտգործնախարարների նոր հանդիպում: Ավելին, նաև պաշտոնապես նշվում էր, որ դա հնարավոր է: Սակայն, հանդիպում չեղավ և Հայաստանի ու Ադրբեջանի արտգործնախարարները առանձին-առանձին հանդիպել են միայն երեք համանախագահների հետ: Ինչո՞ւ չի ստացվել հանդիպումը կամ ով է հրաժարվել, պարզ չէ: Համանախագահները ինչպես միշտ չեն կոնկրետանում և չեն հայտնում որևէ հարցում պատասխանատու կողմի:
Հայաստանն ու Ադրբեջանն էլ միմյանց են մեղադրում ոչ կառուցողական լինելու համար, և սա էլ հայտնի իրողություն է: Այդուհանդերձ, ակնառու է, որ կա խնդիր, ընդ որում խնդիրը կա Սոչիի եռակողմ հանդիպումից հետո, որովհետև ոչ միայն չի ստացվել արտգործնախարարների հանդիպում կազմակերպել Ստոկհոլմում, այլ նաև չի ստացվել Սոչիի եռակողմ հանդիպմանը ՌԴ նախագահ Պուտինի ազդարարած փոխվարչապետերի հայտարարությունը, որ Մոսկվայում հանդիպումից հետո պետք է լիներ հաղորդուղիների ապաշրջափակման թեմայով որոշումների մասին: Փոխվարչապետները հանդիպեցին, սակայն չհայտարարեցին ոչինչ, բացի այն, որ կարիք կա նոր հանդիպումների: Այդ ընթացքում իհարկե Ադրբեջանը Հայաստանին վերադարձրեց տասը գերիների, որոնք գերեվարվել էին նոյեմբերի 16-ի մարտական գործողությունների օրը: Այդ հանգամանքը թերևս հիմք է տալիս դիտարկելու, որ թե Սոչիից հետո, թե Ստոկհոլմի հանդիպման չկայանալու հետ կապված խնդիրների աղբյուրն Ադրբեջանն է և Բաքուն գերիների հարցում վերադարձի քայլին գնացել է թերևս իր այսպես ասած ապակառուցողական պահվածքը փոքր ինչ բալանսավորելու համար:
Իհարկե սա միայն դիտարկում է, որովհետև պարզ չեն մի շարք հանգամանքներ, սակայն բոլոր դեպքերում հազիվ թե Ադրբեջանը գնար գերիների վերադարձի որոշման, եթե Սոչիից հետո մոսկովյան հանդիպման, ինչպես նաև Ստոկհոլմում հանդիպում չկայանալու պատասխանատուն լիներ հայկական կողմը: Համանախագահները պատրաստակամություն են հայտնում հնարավորության դեպքում կազմակերպել արտգործնախարարների նոր հանդիպում և շարունակել Նյու Յորքի և Փարիզի հանդիպումների ընթացքում ծավալված քննարկումները, երբ թույլ տան հանգամանքները: Նկատի ունե՞ն կոնկրետ հանգամաքներ, թե ոչ, պարզ չէ, սակայն այստեղ գուցե ուշադրության է արժանի մեկ այլ իրողություն: ՌԴ արտգործնախարար Լավրովը հայտարարեց, որ Ստոկհոլմում եղել է Մինսկի խմբի երեք համանախագահ երկրների արտգործնախարարների մակարդակով համատեղ հայտարարություն, որում նշվում է նաև ՌԴ միջնորդական դերի մասին: Սակայն, ուշագրավ է այն, որ առ այսօր այդ հայտարարությունը դեռևս հանրայնացված չէ, ինչը առաջացնում է հարցեր, թե արդյո՞ք խնդիրներ առաջացնող հանգամանքները համանախագահների շրջանակում չեն: Ընդ որում, այստեղ հետաքրքիր է նաև այն, թե առկա իրավիճակը ինչ ազդեցություն կթողնի Բրյուսելում դեկտեմբերի 15-ին սպասվող, ազդարարված Փաշինյան-Ալիև հանդիպման վրա:
