Այսօր տեղական ինքնակառավարման մարմինների համամասնական ընտրակարգով հերթական ընտրություններ են անցկացվում Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Վայոց ձորի և Տավուշի մարզերի 36 համայնքներում, իսկ Արագածոտնի մարզի Արևուտ եւ Մեծաձոր համայնքներում անցկացվում են մեծամասնական ընտրակարգով հերթական ընտրություններ:
Արագածոտնի մարզի Թալին խոշորացված համայնքում, ՏԻՄ ընտրություններ են: Ընտրությունները անցկացվելու են համամասնական ընտրակարգով։ Այստեղ կա 32 ընտրատեղամաս, համայնքում ընտրելու իրավունք ունի 19.810 քաղաքացի: Ընտրապայքարում 4 քաղաքական ուժ է ՝ «Քաղաքացիական պայմանագիր» կուսակցությունը, «Զարթոնք» ազգային քրիստոնեական կուսակցությունը, «Մեր համայնքը» դաշինքը եւ «Հայք» լիբերալ կուսակցությունը:
«Քաղաքացիական պայմանագիր» կուսակցության ցուցակը գլխավորում է այժմ համայնքի ղեկավարի պաշտոնակատար Տավրոս Սափեյանը, «Զարթոնք» ազգային քրիստոնեական կուսակցության ցուցակի առաջին համարում է Թալինի նախկին քաղաքապետ, նախկին ՀՀԿ-ական պատգամավոր Մնացական Մնացականյանը, «Մեր համայնքը» դաշինքի ցուցակը գլխավորում է անկուսակցական Տիգրան Հարությունյանը եւ «Հայք» լիբերալ կուսակցության ցուցակի առաջին համարն է Թալինի թիվ 1 հիմնական դպրոցի ուսուցիչ, անկուսակցական Կարեն Գրիգորյանը:
Թալինի 18/01 ընտրատեղամասի հանձնաժողովի նախագահը տեղեկացրեց, որ 9:55-ի դրությամբ ընտրատեղամասի 1722 ընտրողից ընտրությանը մասնակցել է 92 քաղաքացի:
