Այսօր՝ դեկտեմբերի 5-ին 36 խոշորացված համայնքներում տեղական ինքնակառավարման մարմինների ընտրություններ են։ Իշխող «Քաղաքացիական պայմանագիր» կուսակցությունը գրեթե բոլոր տեղերում պայքարում է համայնքապետի պաշտոնի համար։
Համայնքապետի ընտրություններ են Արարատի, Արագածոտնի, Արմավիրի, Գեղարքունիքի, Լոռու, Վայոց Ձորի, Շիրակի, Կոտայքի խոշոր համայնքներում։
Դեկտեմբերյան ՏԻՄ ընտրություններին մի շարք համայնքներում նորաստեղծ դաշինքների ցուցակները գլխավորում են հանրապետական թեկնածուներ, բայց Հանրապետական կուսակցությունը չի մասնակցում։
Այս ընտրություններին 36-ից 20-համայնքում մասնակցում է Հայ հեղափոխական դաշնակցությունը:
Խորհրդարանական «Պատիվ ունեմ» դաշինքից Արթուր Վանեցյանի գլխավորած «Հայրենիք» կուսակցությունն է մի շարք համայնքներում կուսակցական ցուցակով մասնակցում։
Գագիկ Ծառուկյանի գլխավորած «Բարգավաճ Հայաստան» կուսակցությունն էլ է մի քանի համայնքներում միացել ընտրապայքարին։ Աբովյանում ցուցակը գլխավորում է Ծառուկյանի թիկնազորի պետ Էդուարդ Բաբայանը։ «Քաղաքացիական պայմանագիրը» մասնակցում է, ցուցակը գլխավորում է Պավել Ցուգունյանը, երրորդ ուժը ՀՅԴն է։
«Լուսավոր Հայաստանը» հինգ համայնքում, այդ թվում՝ Վանաձորում է մասնակցում։ Այստեղ համայնքապետի պաշտոնի համար պայքարում է տասը քաղաքական ուժ։
