Միացյալ Նահանգները ողջունում է Հայաստանի և Ադրբեջանի կառավարությունների միջև ուղիղ երկխոսության վերականգնումը: Աս մասին դեկտեմբերի 2-ին Ստոկհոլմում՝ ԵԱՀԿ արտգործնախարարների խորհրդի հանդիպմանն ասել է Միացյալ Նահանգների պետքարտուղար Էնթոնի Բլինկենը:
«Մենք հորդորում ենք նրանց (խմբ. – Հայաստանին և Ադրբեջանին) առաջընթաց գրանցել մարդասիրական, այդ թվում և գերիների, ականազերծման, անհետ կորածների հարցերում, հետաքննելով մարդու իրավունքների և միջազգային հումանիտար իրավունքի ենթադրյալ խախտումները՝ պատասխանատվության ենթարկելով մեղավորներին: Ես հուսով եմ, որ մենք կարող են բոլորս, այդ թվում և Ռուսաստանը, աշխատել միասին, որպեսզի առաջընթացը շարունակական լինի»,- ասել է Բլինկենը:
Անդրադառնալով դելիմիտացիայի ու դեմարկացիայի հարցերին՝ ԱՄՆ պետքարտուղարը նշել է. «Մենք կոչ ենք անում կողմերին լուծելու կարևոր այնպիսի հարցեր, ինչպիսիք են սահմանների դելիմիտացիան ու դեմարկացիան, տնտեսական ու տրանսպորտային կապերի վերականգնումը, և շարունակել Մինսկի խմբի համանախագահների հովանու ներքո աշխատանքը՝ հանուն Լեռնային Ղարաբաղի հակամարտության տևական ու խաղաղ լուծման»:
Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանի կարծիքով՝ դրական է այն հանգամանքը, որ Բայդենի վարչակազմը հետևում է այս տարածաշրջանում տեղի ունեցող զարգացումներին․«Ցանկալի կլիներ իհարկե, որ իրենց համար այս տարածաշրջանի հարցերն առաջնահերթ լինեին ու իրենք դոմինանտ դերակատարություն ունենային, բայց այն, որ իրադարձությունների զարգացմանը հետևում են՝ էլի դրական հանգամանք եմ համարում։ Միայն այն փաստը, որ Միացյալ Նահանգներից հնչում են հայտարարություններ, նման գերտերությունը հետաքրքրություն է ցուցաբերում Արցախի խնդրի վերաբերյալ՝ միանշանակ դրական եմ համարում»,-«Առաջին լրատվական»-ի հետ զրույցում ասաց Վարդանյանը։
Մեր զրուցակցի դիտարկմամբ, սակայն, առաջիկա ժամանակահատվածում առավել մեծ ուշադրություն ու նախաձեռնողականություն Միացյալ Նահանգներից սպասել պետք չէ․«Հաշվի առնենք, որ տարեվերջ է, Միացյալ Նահանգներում կան այլ խնդիրներ ևս։ Պետք է մի փոքր սպասել։ Հիմա շատերը սպասում են դեկտեմբերի 15-ին Բրյուսելում կայանալիք Փաշինյան-Ալիև հանդիպմանը՝ Արևելյան գործընկերության գագաթաժողովի շրջանակներում։ Նաև շատ կարևոր է ԱՄՆ-ում առաջիկա օրերին սպասվող Ժողովրդավարությունների գագաթաժողովը, որին Հայաստանն իր մասնակցությունը հաստատել է։ Ես հուսով եմ, որ այդ գագաթաժողովի ժամանակ էլ առկա խնդիրների մասին կբարձրացվի ու առաջընթաց կգրանցվի։ Նման հարթակների օգտագործումը ես խիստ կարևոր եմ համարում»,- նկատեց Արփի Վարդանյանը։
Վարդանյանի խոսքերով՝ կա տպավորություն, որ Միացյալ Նահանգներն ուզում է էլ ավելի մեծ ակտիվություն ցուցաբերել արցախյան խնդրի վերաբերյալ ու դրա մենաշնորհը միայն Ռուսաստանին չթողնել․«Բայց հարցն այն է, թե ինչպես է դա անելու, այդ ակտիվությունը գործնականում ինչ դրսևորում է ստանալու»:
Ըստ մեր զրուցակցի՝ այդ ակտիվությունը կդրսևորվի ԵԱՀԿ Մինսկի խմբի շրջանակներում, բայց չի բացառվում նաև, որ Միացյալ Նահանգները կարող է նաև առանձին ակտիվություն ցուցաբերել՝ ճիշտ այնպես, ինչպես Ռուսաստանը։