«Առաջին լրատվական»-ի հարցերին պատասխանել է Արցախի խորհրդարանի նախկին պատգամավոր Վահրամ Աթանեսյանը
Պարոն Աթանեսյան, Սոչիի հանդիպումից հետո նշվում է, որ սահմանազատումը և սահմանագծումը պետք է իրականացվի միջազգայնորեն ճանաչված փաստաթղթերի հիման վրա։ Ինչպիսի՞ փաստաթղթերի մասին կարող է խոսքը լինել։
Ես չեմ կարող ասել, թե միջազգային ինչ փաստաթղթերի մասին է խոսքը։ Սահմագծումը և սահմանազատումը պետք է տեղի ունենան խորհրդային քարտեզներով։
Ընդհանրապես, ի՞նչ կարծիք ունեք սահմանազատման գործընթացի վերաբերյալ։ Որքանո երկարատև կարող է լինել այդ գործընթացը և այդ ընթացքում ինչ վտանգների առջև կարող ենք կանգնել:
Հայաստանը վտանգի առջև է այսօր, այս փուլում, երբ Ադրբեջանի հետ ունի ոչ թե ճանաչված սահման, այլ՝ շփման գիծ։ Սահմանագծում-սահմանազատում պետք է իրականացվի, որպեսզի վտանգը հասցվի նվազագույնի։
Հնարավոր սահմանզատումը որքանո՞վ հնարավորություն կտա թուլացնելու լարվածությունը։ Նշվում է, որ այն երկար տարիների գործընթաց է ենթադրում։
Սահմանագծում-սահմանազատում իրականացնել՝ նշանակում է հարաբերությունների կարգավորման գործընթաց սկսել։ Տրամաբանությունը դա է։ Գործնականում, իհարկե, դրա համար տարիներ կպահանջվեն։ Այդ ընթացքում կարող են լինել նաև էքսցեսներ, բայց, կրկնեմ, այս փուլում գլխավորը լայնածավալ պատերազմի բացառումն է։ Ես տպավորություն ունեմ, որ Սոչիում այդպես են պայմանավորվել։ Թե որքան հավատարիմ կլինի թշնամական կողմն այդ հանձնառությանը՝ դժվար է ասել։ Հայաստանը պարտավոր է յուրաքանչյուր օր բարելավել շփման գիծը՝ միաժամանակ վարելով պրագմատիկ արտաքին քաղաքականություն։
Պարոն Աթանեսյան ինչպիսի՞ ակնկալիքներ կան Բրյուսելի հանդիպումից։ Պուտինը Սոչիում տեղի ունեցած հանդիպմանը խոսեց դեկտեմբերի 15-ին Բրյուսելում Փաշինյան–Ալիև հանդիպման մասին՝ նշելով, որ ռուսական կողմը նույնպես ողջունում է այդ այցը, և որքան շատ լինեն շփումները, այնքան լավ:
Ռուսաստանի նախագահը, որքան հիշում եմ, շատ հստակ ասել է, որ կողմերը Սոչիում պետք է մի քայլ առաջ անցնեն, որից հետո այլ հարթակներում շարունակեն քննարկումները։ Մնացածը դիվանագիտական նրբասացություն է։ Բրյուսելից ոչ մի գործնական ակնկալիք ես չունեմ, և առհասարակ, 44-օրսօրյա պատերազմից հետո ի՞նչ ակնկալիք կարելի է ունենալ։ Թերևս՝ միայն մեկ․ իրավիճակի կայունացում։