Ինչպես արդեն հայտնի է, Առողջապահության համաշխարհային կազմակերպությունը (ԱՀԿ)-ն հայտարարել է Կորոնավիրուսի նոր շտամի՝ «Օմիկրոնի» առաջացման մասին։ Ըստ կազմակերպության՝ Հարավային Աֆրիկայում առաջացած կորոնավիրուսի նոր՝ «Օմիկրոն» շտամով վարակման դեպքեր արձանագրվել են նաև Բոտսվանայի Հանրապետությունում, Հոնկոնգում, Բելգիայում, Իսրայելում, Ռուսաստանում։ Մի շարք երկրներ արդեն ձեռնարկել են սահմանափակող միջոցառումներ, այդ թվում` սահմանել են մուտքի արգելք աֆրիկյան մի շարք երկրներից։ Այսօր Առողջապահության նախարար Անահիտ Ավանեսյանը հայտարարեց, որ Հայաստանը ևս ժամանակավորապես կսահմանափակի մի շարք երկրներից, այդ թվում՝ Հարավային Աֆրիկայի Հանրապետությունից քաղաքացիների մուտքը երկիր։ Գիտնականները դեռ չեն պարզել նոր շտամի վտանգավորության աստիճանը։ Կառույցը շատ բարձր է գնահատել նոր շտամի վտանգավորության աստիճանը, միաժամանակ արձանագրել, որ գիտնականներն առայժմ շատ քիչ բան գիտեն դրա տարածման ու փոխակերպումների վերաբերյալ։
Համաճարակաբան Մերի Տեր-Ստեփանանի խոսքով՝ բոլոր տվյալները դեռ շատ նախնական են ու փոփոխության ենթակա են բոլոր տվյալները, բայց այդպիսի աղոտ տվյալները ցույց են տալիս՝ Կորոնավիրուսային հիվանդության նոր շտամն առանձնանում է նրանով, որ ունի շուրջ 50 մուտացիա, որից 30-ը` սպայկային սպիտակուցում։ Այս արդյունքները վկայում են, որ վիրուսը հնարավոր է ավելի հեշտ վարակելի և արագ ու հեշտ տարածվող բնույթ է կրելու, և կարելի է ասել՝ կարողանալու է անդրադառնալ պատվաստանյութի արդյունավետության վրա։
«Բանն այն է,որ առկա բոլոր պատվաստանյութերի հիմնական թիրախը հենց սպայկային սպիտակուցն է, հետևաբար այդքան շատ մուտացիաները առաջացնելու են պատվաստանյութերի ազդեցիկության և արդյունավետության խնդիր, և հնարավոր է անհրաժեշտություն առաջանա պատվաստանյութերի մեջ որոշ փոփոխություններ կատարել»,-ասաց համաճարակաբանը։ Նա նշեց,որ պատվաստանյութերի փոփոխությունների մասին արդեն հայտարարել են «Մոդեռնայի» և «Սպուտնիկի» ներկայացուցիչները։
Հարցին՝ արդյոք սա նշանակում է, որ պատվաստված անձինք ևս պետք է նորից պատվաստվեն, հայտնի է՝ ինչպիսի բարդ ընթացք ունի հիվանդությունը, համաճարակաբանն ասաց, որ, չի բացառվում, որ կարիք լինի նորից պատվաստվելու, որը հաստատապես կարող ենք ասել միայն որոշ փաստերի առկայության պարագայում՝ հասկանալու համար ինչքանով են եղած պատվաստանյութերի հակամարմինները ունակ չեզոքացնելու այս նոր շտամի անտիգենը, հարուցիչները։
Ըստ համաճարակաբանի՝ «Օմիկրոն» շտամի մասին հայտնի է, որ ավելի շատ երիտասարդների շրջանում է գրանցվում, իսկ հիվանդության բնույթի, վտանգավորության հետ կապված դեռ որոշակի հստակություն չունեն, քանի որ դեպքերը շատ են։ Այնուամենայնիվ, Տեր-Ստեփանյանի համոզմամբ, նոր շտամերի առաջացումը հետևանք է պատվաստումների գործընթացի ձգձգվելու, դանդաղ զարգացման հետ։ Սա չի վերաբերվում միայն մեզ, այլ ամբողջ աշխարհի մասշտաբով պետք է լինի։
Լուսանկարը՝ Photolure-ի