Լուսանկարը՝ Armeniasputnik-ի
Մայիսի 12-ից Իշխանասարի հատվածում տեղակայված ադրբեջանական զինուժը մի քանի օր առաջ սկսել է հետ քաշվել։ Իշխանասար գյուղի վարչական ղեկավար Մարատ Պետրոսյանը «Առաջին լրատվական»-ի հետ զրույցում նշեց, որ սարերի գլխին ձյուն է եկել, սարսափելի ցուրտ է, սակայն նկատելի է, որ ադրբեջանական զորքերը հետ են քաշվել․ «Թե հիմա ցուրտն է պատճառը, թե ինչ, չեմ կարող ասել, թող մանրամասները ասի ՊՆ-ն, ես մանրամասներին չեմ տիրապետում։ Միայն կարող եմ հստակ ասել, որ, ակնհայտ էմ չեն երևում»,-ասաց նա՝ հավելելով, որ ՊՆ-ից համայնքի ղեկավարին որևէ մանրամասներ չեն տրամադրել։
Իշխանասարում յոթանասուն ընտանիք է ապրում, որևէ մեկը մայիսից հետո չի լքել գյուղը։ Մարատ Պետրոսյանը նշեց, որ սովետական քարտեզներով Իշխանասարը հայկական է, չբացառեց, որ Սոչիի եռակողմ հանդիպումից հետո սահմանազատման գործընթացն սկսվել է։
«Արդեն մի քանի օր է, մենք արձանագրել ենք, որ չկան հետ են քաշվել, հիմա թե հանդիպումն է եղել պատճառը, որքանով է կապված հանդիպման հետ, չեմ կարող ասել, բայց չի բացառվում։ Փաստ է, որ արդեն մի քանի օր է չկան», -նշեց համայնքի ղեկավարը։
Հիշեցնենք, որ նոյեմբերի 26-ին Սոչիում ընդունված հայտարարության մեջ մասնավորապես, ասվում էր. «Պայմանավորվել ենք քայլեր ձեռնարկել հայ-ադրբեջանական սահմանին կայունության և անվտանգության մակարդակը բարձրացնելու ուղղությամբ և գործընթացը մղել Ադրբեջանի Հանրապետության և Հայաստանի Հանրապետության միջև պետական սահմանի սահմանազատման և հետագայում սահմանագծման հարցով երկկողմ՝ կողմերի հայտի հիման վրա Ռուսաստանի Դաշնության խորհրդատվական մասնակցությամբ հանձնաժողով ստեղծելու ուղղությամբ»: