Սաղիմահայերը պահանջում են Նուրհան պատրիարքի հրաժարականը՝ ապօրինի համարելով նրա որոշումը։ Բանն այն է, որ պատրիարքը Երուսաղեմի վանքապատկան հողատարածքը 99 տարվա վարձակալությամբ թույլտվություն է տվել հրեա գործարարին հյուրանոց կառուցելու նպատակով: Տեղի միաբանները ընդվզում են պատրիարքի որոշման դեմ։ Հայաստանյայց Առաքելական Եկեղեցու արտասահմանյան թեմերում ծառայող Երուսաղեմի Սրբոց Հակոբյանց Միաբանության անդամները նույնպես միացել են միաբաններին և հայտարարություն են տարածել, որտեղ մտահոգություն են հայտնել վերջին շրջանում Երուսաղեմում «Կովերի պարտեզ» տարածքը վարձակալությամբ տալու հետ կապված: Միաբանների և եպիսկոպոսների հայտարարությանն է միացել Արիս արքեպիսկոպոս Շիրվանյանը։
«Առաջին լրատվական»-ը Երուսաղեմի պատրիարքությունում ստեղծված իրավիճակի շուրջ զրուցել է Երուսաղեմի հայոց պատիրարքություն երկար տարիներ տեղապահ աշխատած Արիս արքեպիսկոպոս Շիրվանյանի հետ։
-Սրբազան, Երուսաղեմի Հայոց պարտրարքությունից չկան ազդակներ, որ ընդառաջ կգնան ձեր պահանջին, այս պայմաններում ինչպե՞ս է հնարավոր փրկել «Կովերի պարտեզ» տարածքը:
Արդեն նշել ենք, որ նախընտրելի է, էր պատրիարքը և այդ գործարքը մյուս ստորագրողները հետ վերցնեն իրենց ստորագրությունները, և այդ ձևով լուծվի այս պայմանագրերի հարցը: Եթե դա չարվի, այն ժամանակ պետք է որ միաբանների նախաձեռնությամբ Ընդհանուր ժողով հրավիրվի, որպեսզի արգելքներ դրվեն այս գործարքի հետ կապված, և Ընդհանուր ժողովը որոշում կկայացնի:
Բայց մենք տեսնում ենք նախօրեին ցուցարարների հետ տեղի ունեցած միջադեպը: Հանրությունը ևս դժգոհում է այս գործարքից, ու այդ դեպքում ի՞նչն է հետ պահում նրանց այդ որոշում չեղարկելուց:
Այս պահին ես չեմ կարող որևէ մեկնաբանություն տալ, քանի որ այդքան տեղեկացված չեմ, որպեսզի կարողանամ հետևություններ անել: Ավելի լավ է, որ այնտեղ ապրող անձանց հետ խոսվի այդ մասին, որպեսզի տեղում իրազեկ մարդիկ կարողանան իրենց կարծիքը հայտնել:
Սրբազան, այս խնդիրը, կարծեք թե, հոգևոր դասին երկու մասի է բաժանել: Ինչի՞ կհանգեցնի սա:
Դա դրական երևույթ է, որ գոնե երկու կողմանի կարծիքներ կան, ոչ թե ավելի շատ: Երբ պաշտոնական Ընդհանուր ժողով հրավիրվի, ամենքն իրար կլսեն և յուրաքանչյուրն ազատորեն իր կարծիքը կհայտնի և ըստ այդմ, որոշում կկայացվի:
Այս խնդրին անդրադարձավ նաև Մայր Աթոռ Սուրբ Էջմիածինը: Արդյոք այդ անդրադարձը բավարար էր, թե՞ կոնկրետ քայլեր պետք է ձեռնարկվեն:
Այս պահին ես չգիտեմ, թե Մայր Աթոռն ինչ դիրքորոշում է որդեգրել:
Եթե Երուսաղեմի պատրիարքը հայր պարետի հետ շարունակի պնդել այս գործարքը և չչեղարկեն այն, նրանք պետք է հրաժարա՞ն տան:
Նախ, պատրիարքն ինքը պետք է անձնապես որոշում կայացնի, և ապա Միաբանական ժողովը պետք է արտահայտի իր կամքը:
Դուք հույս ունեք, որ Նուհան Սրբազանը ընդառաջ կգնա միաբանների կոչին և հետ է կանչելու իր ստորագրությո՞ւնը:
Այո, ես այդպիսի հույս ունեմ:
Երուսաղեմի իշխանությունները, որոնք այս հարցով նույնպես հետաքրքրված են, որևէ կերպ կարո՞ղ են աջակցել համայնքին, նպաստել, որ այդտեղ հյուրանոց չկառուցվի:
Նրանք էլ իրենց հերթին նայում են, թե վանական իշխանությունն ինչ որոշում կկայացնի: