ՀՀ ԱԳՆ խոսնակը հայտարարել է, որ Հայաստանը հայ-թուրքական հարաբերությունների կարգավորման հարցում աջակցելու առաջարկներ ստացել է տարբեր երկրներից, սակայն այդ հարցը քննարկել է ՌԴ-ի հետ և տեղեկացրել, որ պատրաստ են հարաբերությունների կարգավորմանն՝ առանց նախապայմանների: ՌԴ ԱԳՆ խոսնակ Զախարովան իր հերթին վերահաստատել է՝ Հայաստանը պաշտոնապես դիմել է Ռուսաստանին՝ միջնորդելու Թուրքիայի հետ հարաբերությունները կարգավորելու հարցում: Թեմայի շուրջ «Առաջին Լրատվական»-ը զրուցել է Ստամբուլի «Ժամանակ» օրաթերթի գլխավոր խմբագիր Արա Գոչունյանի հետ:
«Ըստ տրամաբանության՝ հիմնական միջնորդի դերը ստանձնում է Ռուսաստանը, կա երկու պատճառ: Պատճառներից մեկը վերաբերում է Թուրիքային, մյուսը՝ Հայաստանին: Թուրքիայի վերաբերյալ պատճառը պայմանավորված է այն հանգամանքով, որ Անկարան վերջին երեք տասնամյակում Հայաստանի հետ հարաբերությունների կարգավորման գործընթացը ցանկացել է առաջ տանել Մոսկվայի հետ անմիջական ներդաշնակության մեջ դնելով: Վերջին հաշվով, ըստ թուրքական քաղաքականության տրամաբանության, Հայաստանի հետ հարաբերությունները առանձին գլուխ են համարվում ՌԴ-ի հետ հարաբերությունների համատեքստում: Երկրորդ, գործնականում այս պահին ՀՀ սահմանները պահպանում են ռուսական զորքերը, դժվար է պատկերացնել որևէ գործընթաց, որին հայկական կողմը կներգրավվի առանց Մոսկվայի հետ լիարժեք փոխըմբռնման, այն էլ հայ-թուրքական հարաբերությունների նման կնճռոտ հարցում»,-ասաց Գոչունյանը:
Առավել մանրամասն՝ տեսանյութում: