ՀՀ կառավարությունը խնդիր է դրել իրականացնել 300 դպրոցի և 500 նախադպրոցական հաստատության հիմնանորոգման, վերանորոգման և կառուցման ծրագրեր:
«Արմենպրես»-ի մամուլի սրահում հրավիրված ասուլիսում ՀՀ ԿԳՄՍ նախարարի տեղակալ Ժաննա Անդրեասյանը նշեց, որ այս ուղղություններով աշխատանքներն ինտենսիվ ընթանում են:
«Երբ խոսում ենք նախադպրոցական հաստատությունների մասին, պետք է նշեմ, որ ծրագրերը վերաբերում են և՛ դասական մանկապարտեզների հիմնանորոգմանն ու կառուցմանը, և՛ փոքրաքանակ երեխաներով համալրված բնակավայրերում այլընտրանքային նախադպրոցական ծառայությունների մատուցմանը: Օրինակ, մինչև 20 երեխա ունենալու պարագայում ոչ թե դասական մանկապարտեզ է ստեղծվում, այլ նման ծառայություն է ներդրվում: Արդեն 10 նման բնակավայրերում նախադպրոցական ծառայություն ստեղծել ենք»,- ասաց Ժաննա Անդրեասյանը:
Հանրակրթության ոլորտում ծրագրերը ևս բազմաթիվ են: Խոսքը թե մոդուլային դպրոցների կառուցման մասին է, թե ընթացիկ հիմնանորոգումների: Ժաննա Անդրեասյանն առանձնացրեց Կապան խոշորացված համայնքի գյուղական բնակավայրերում իրականացվող իր բնույթով բոլորովին նոր ծրագիրը: Այն խնդիր է դրել ապահովել կրթական որակյալ ծառայություն:
«Մեր նպատակն է միասնական աշխատանք իրականացնել, թե ենթակառուցվածքների զարգացման, թե որակյալ կրթության ապահովման միջոցով: Մենք նախատեսում ենք Կապանի 31 գյուղական բնակավայրերի համար ստեղծել նման 13 արդիական ենթակառուցվածքներ, որոնք իրենց բնույթով լինելու են կրթահամալիրներ: Այսինքն՝ իրենց մեջ ներառելու են թե դպրոցական, թե նախադպրոցական ծառայությունները»,- ասաց Ժաննա Անդրեասյանը:
ՀՀ քաղաքաշինության կոմիտեի նախագահի տեղակալ Դավիթ Գրիգորյանը տեղեկացրեց, որ իրենք նախաձեռնել են մի շարք օրենսդրական և ենթաօրենսդրական փոփոխություններ, որոնք ուղղված են քաղաքաշինական ծրագրերի իրականացման գործընթացի դյուրացմանը:
«Առաջարկվող փոփոխությունները թույլ կտան ավելի որակյալ ու արագ իրականացնել շինարարական ծրագրերը: Նախ՝ մենք այս տարի փոխեցինք սեյսմակայունության շինարարական նորմերը, որոնք հնարավորություն կտան առավել սեյսմակայուն ու որակյալ շինարարություն իրականացնել»,-ասաց Դավիթ Գրիգորյանը:
Մյուս կարևոր փոփոխությունն այն է, որ կոմիտեն նախաձեռնել է բազմակի կիրառվող նախագծերի օգտագործման գործընթաց: Այն նախագծերը, որոնք արդեն կիրառվել են դպրոցներ ու նախակրթական հաստատություններ կառուցելու գործում, կկիրառվեն նաև այլ համայնքներում:
«Դա կարևոր քայլ է քաղաքաշինական ծրագրերն ավելի արագ իրականացնելու համար: Քանի որ նախագծման վրա բավական ժամանակ ենք ծախսում, հետևաբար հիմա մեկ որակյալ նախագիծ պատվիրելով և հաստատելով՝ այն կարող ենք կիրառել այլ տեղերում»,-ասաց Դավիթ Գրիգորյանը:
Ներկայացնելով ընթացքի մեջ գտնվող դպրոցների, նախակրթական հաստատությունների շինարարական ծրագրերը՝ ՀՀ քաղաքաշինության կոմիտեի քաղաքաշինական ծրագրերի իրականացման վարչության պետ Արսեն Միրզոյանը նշեց, որ ներկայում 100-ից ավելի կրթական օբյեկտի հետ կապված աշխատանքներ են իրականացվում: Բուն շինարարական գործընթացներ իրականացվում են շուրջ 30 օբյեկտում:
«Ներկայում ունենք փոքրաքանակ երեխաներով համալրված համայնքների թվով 22 դպրոցների կառուցման ծրագրեր, որոնցից 21-ի շինարարական աշխատանքները մեկնարկել են: Դրանցից 15-ի շինարարական աշխատանքների ավարտը նախատեսված է 2022 թվականին: Սրանք մեկ հարկանի տիպային նախագծեր են 100-120 աշակերտների համար: Ներառված է նաև նախակրթարանի հատված»,- ասաց Արսեն Միրզոյանը:
Ներկայում ընթանում են 144 տեղ-հզորությամբ մանկապարտեզների նախագծման աշխատանքներ: Դրանք իրականցվում են արդեն իսկ Արևիկ համայնքի համար մշակված տիպային նախագծով: Արսեն Միրզոյանը նշեց, որ սա առաջին նախատիպը կլինի այդ հզորությամբ մանկապարտեզի՝ մետաղական կոնստրուկցիաների կիրառմամբ, արագ ընթացքող շինարարական պրոցեսներով: Մանկապարտեզը հանձնվելու է շահագործման կահավորված, անհրաժեշտ գույքով, սարքավորումներով, ինչը մեկ շինարարական փաթեթի մեջ է ներառված: Արդյունքները գնահատելուց հետո հնարավոր է այս մոդելը կիրառել նաև այլ նախագծերի դեպքում:
