Վարչապետ Նիկոլ Փաշինյանն երեկ ընդունել է Սյունիքի մարզի՝ Կապան, Մեղրի, Տեղ, Տաթև, Գորայք, Քաջարան, Սիսիան համայնքների ղեկավարներին, նաև Գորիս համայնքի ղեկավարի տեղակալին: Նա շնորհավորել է բոլոր համայնքների նորընտիր ղեկավարներին. «Կարևոր է արձանագրվի՝ քաղաքացին վստահ լինի, որ իր ընտրությունն է որոշիչը: Անկախ նրանից, թե որ դեպքում ինչքան դա դուր կգա իշխանությանը, ինչքան դուր կգա ընդդիմությանը՝ ժողովուրդը պետք է իմանա, որ ինքը որոշիչ ուժ է, և սա չափազանց կարևոր գործոն է»,- ասել է Փաշինյանը:
Հանդիպմանը քննարկվել են կառավարություն-ՏԻՄ համագործակցության, Սյունիքի համայնքներում կառավարության կողմից իրականացվող ծրագրերի ընթացքի, այդ թվում՝ ուղղված ենթակառուցվածքների բարելավման ու զարգացման հարցերը:
Վարչապետն անդրադարձել է նաև տարածաշրջանում տնտեսական և տրանսպորտային ապաշրջափակման, ինչպես նաև սահմանների դեմարկացիա ու դելիմիտացիա իրականացնելու հնարավորություններին:
Հատկանշական է, որ այս համայնքներից շտերում ընտրվել են ընդդիմադիր քաղաքական ուժերի թեկնածուները, այդ թվում Գորիսում, Կապանում, Մեղրիում, Տաթևում:
Տաթև համայնքի նորընտիր ղեկավար Սամվել Լալայանը, ով ներկայացնում է ընդդիմադիր «Շանթ դաշինք» կուսակցությունը, «Առաջին լրատվական»-ի հետ զրույցում նշեց, որ հանդիպումը նորմալ է անցել. «Ընդհանուր զրույց է եղել, որ իրար հետ համագործակցենք, իրար հետ աշխատենք: Մենք բոլորս ասել ենք՝ խնդիր չկա: Ոչ մի խնդիր վարչապետի հետ չկա, ի՞նչ խնդիր պետք է լինի: Հանդիպումը գնահատում եմ շատ լավ ու դրական: Մեզ մտահոգող հարցերը բարձրացրել ենք, առաջարկել ենք և բոլոր հարցերում համաձայնության ենք եկել: Որևէ վիճաբանություն կամ խոսակցություն չի եղել: Ինչ էլ առաջարկել ենք, համաձայնել է, համաձայնությունը տվել է, ասել է՝ խնդրեմ, արեք»,-ասաց նա:
Սամվել Լալայանի խոսքով, պայմանավորվածություն է ձեռք բերվել, որ էլի կհանդիպեն և հրատապ լուծում պահանջող խնդիրների շուրջ կխոսեն:
«Անվտանգային խնդիրների հետ կապված ևս առաջարկներ եղել են, որոնց վարչապետը համաձայնել է, ասել է, որ օգնելու են այդ հարցերում: Տաթև համայնքի մասին չենք խոսել, քանի որ հիմա շատ շուտ ուզում ենք Լծեն-Մեղրի կառուցվող ճանապարհի հարցը լուծենք, որպեսզի տարաձայնություններ չլինեն»,-ասաց համայնքի ղեկավարը:
Նա հավաստիացրեց, որ նման հանդիպումների ժամանակ ընդդիմություն-իշխանություն բաժանում չկա, պետք է համագործակցելով լուծել խնդիրները: