Ռուսաստանի վարչապետ Միխայիլ Միշուստինը Եվրասիական միջկառավարական խորհրդի ընդլայնված կազմով նիստում հայտարարել է, որ Եվրասիական տնտեսական միության քաղաքացիները վարկերի համար դիմելու դեպքում հավասար հնարավորություններ կստանան միավորման ամբողջ տարածքում։ Համապատասխան համաձայնագիրը ստորագրվեց նոյեմբերի 19-ին Երևանում։
Միշուստինն ընդգծել է, որ «Հնգյակի» քաղաքացիները վարկեր ստանալու համար դիմելիս հավասար հնարավորություններ կստանան ամբողջ միության տարածքում։ Ընդ որում՝ բանկերը կկարողանան ստուգել իրենց հաճախորդի պատմությունը՝ անկախ նրա քաղաքացիությունից, և վերլուծելով ռիսկերը` վարկերի տրամադրման համապատասխան որոշումներ ընդունել:
Մոտ ժամանակներս միության հանրապետությունների կենտրոնական բանկերը կհաստատեն վարկային պատմությունների ազգային բյուրոներում պահվող տվյալների փոխանակման տեխնիկական կանոնները: Այս տվյալները պետք է պաշտպանության բարձր աստիճան ունենան: Այսպիսով` միության հանրապետություններից մեկի ռեզիդենտները կարող են վարկի համար դիմել մնացած չորս երկրների բանկեր։ Բանկերը կարող են ստուգել նրանց վարկային պատմություններն ու վարկավորման մասին որոշումներ ընդունել:
«Հեռավար վարկավորման պայմաններում անհրաժեշտ է զարգացնել ինտերնետ-բանկինգի մեխանիզմները, որոնք արդեն զարգանում են Ռուսաստանում, Ղազախստանում և մեր մյուս հանրապետություններում»,- շեշտել է Եվրասիական տնտեսական հանձնաժողովի տնտեսական և ֆինանսական քաղաքականության հարցերով նախարար Ռուսլան Բեկետաևը:
Տնտեսագետ Արմեն Քթոյանը չի կարծում, թե տվյալների փոխանակումը կարող է ռիսկեր պարունակել։ «Առաջին լրատվական»-ի հետ զրույցում նա իր կարծիքը հիմնավորեց հետևյալ կերպ․«Համենայնդեպս եթե միասնական տնտեսական տարածության կամ միասնական մաքսային տարածություն կա, այսպես թե այնպես որոշ գործարքների մասով տվյալների փոխանակման համակարգ կա։ Եվ այստեղ նույն բանկային համակարգի պարագայում այդ կարգի տվյալների փոխանակությունը, որն անհրաժեշտ է վարկունակության գնահատման համար, չեմ կարծում, թե շատ մեծ ռիսկեր ստեղծի»։
Հարցին, այդ որոշումը Հայաստանի համար ինչ-որ առավելություն պարունակո՞ւմ է, Արմեն Քթոյանը պատասխանեց․«Առավելությունն այն է, որ այն երկրները, որտեղ գնաճը ցածր է, ցածր է նաև վարկի տոկոսը կամ ավելի շատ գործիքներ են առաջարկվում, ուստի մեր քաղաքացիները կարող են դիմել այդ երկրներին։Այսինքն՝ որտեղ որ գինը ցածր է, դու այդտեղ կարող են գնալ ու վարկ վերցնել։ Իհարկե հիմա ամբողջ ԵԱՏՄ տարածքում գնաճը բավականին բարձր է ու այստեղ ինչ-որ ակնհայտ առավելություններ չկան, այդուհանդերձ կան ամենատարբեր գործիքներն ու ամենաբազմազան հնարավորությունները, վարկային ամենատարբեր ծրագրերը, ուր կարող են դիմել ու մասնակցել»։
Ինչ վերաբերում է Հայաստանի բանկային համակարգից օգտվելու հնարավոր առավելություններին, տնտեսագետն ասաց․«Մեր բանկերի համար հայաստանյան շուկան սահմանափակ է, հագեցած է։ Սա, ըստ էության, հնարավորություն է դուրս գալ երկրի սահմաններից ու վարկային պրոդուկտներ առաջարկել նաև ավելի մեծ շուկաների համար։ Սա նույնն է, որ Հայաստանում արտադրված գյուղմթերքը կարողանում ես Ռուսաստանում իրացնել։ Նույնը նաև հայաստանյան բանկային համակարգի պրոդուկտը կարող ես առաջարկել ավելի մեծ շուկայում, որը միայն առավելություններ է պարունակում»,-եզրափակեց նա։
