Դեռևս 2004թ. կառավարության կողմից ընդունվեց մի որոշում, որով նախատեսվում էր Երևանի Դալմայի այգիների 750 հա գոտուց կանաչապատ թողնել միայն 256-ը։ Այս որոշումը թույլ տվեց Երևանի քաղաքապետարանին վաճառքի հանել այգու առանձին հողամասեր։ Վաճառված տարածքներում սկսվեցին բետոնապատման աշխատանքներ։ Ի դեպ, այդ կանաչ տարածքները ոչնչացնելուց առաջ որևէ զգուշացում չարվեց այն վարձակալողներին, ովքեր տարիներ շարունակ մշակել էին այգին, ավելին՝ նրանց ձեռքից հողը խլվեց պայմանագրերի ժամկետը դեռ չլրացած։
Այսինքն՝ խախտվել է մարդկանց սեփականության իրավունքը։ Արդեն յոթ տարի է անցել, սակայն նախկին սեփականատերերից շատերը փոխհատուցում չեն ստացել։ Դալմյանի այգիներում կատարվածը նաև մեկ այլ օրենքի խախտում է. հաշվի չի առնվել կանաչ տարածքի վերացման արդյունքում շրջակա միջավայրին սպառնացող վտանգը, չի գնահատվել այգիների պատմամշակութային արժեքը։ Այս թեմային բազմիցս անդրադարձել են էկոլոգիական հիմնահարցերով զբաղվող հկ-ները:
Ecolur կայքը մասնավորապես գրում է, որ այգում շինարարությունը սկսվել է առանց քաղաքաշինության նախարարության, պատմամշակութային կոթողների պաշտպանության կոմիտեի թույտվության՝ առանց նախապես փորձագիտական աշխատանքներ կատարելու։
Այգու նախկին հողօգտագործողները չեն դադարում պայքարել արդարության համար։ Նրանք և «Դալմա-Սոնա» ընկերության նախագահ Ռուզաննա Ղազարյանը դիմել են քաղաքապետարան։ 4 ամիս առաջ նրանք քաղաքապետարանից հավաստիացումներ են ստացել, թե առաջիկայում համարժեք փոխհատուցում կստանան: Սակայն մինչ այժմ հարցը լուծում չի ստացել։
ՄԱԿ-ի Եվրոպական տնտեսական հանձնաժողովն այս տարվա 29.06.-01.07.2011 Քիշինևի նիստի ժամանակ անդրադարձել է Դալմայի այգիների խնդրին։ Հանձնաժողովը փաստել է, որ Հայաստանը այգիների մասին որոշմամբ խախտել է Օրհուսի կոնվենցիայի մի շարք դրույթներ։ Նիստին նաև հանձնարարական է տրվել ՀՀ կառավարությանը՝ խախտումների վերացման ուղղությամբ իրականացնել մի շարք միջոցառումներ, սակայն Դալմայի այգիների նախկին օգտագործողները վկայում են, որ ոչ մի քայլ չի կատարվել: