ԱՄՆ Սենատի զինված ուժերի հարցերով հանձնաժողովը Ռոդ Այլենդի նահանգի սենատոր Ջեք Ռիդի նախագահությամբ կքննարկի Ադրբեջանին և Թուրքիային վերաբերվող հարցերը: «Թվիթեր»-ի իր էջում այս մասին հաղորդել է Հայ դատի հանձնախումբը:
«Կքննարկվեն երեք հիմնական ուղղությունները` ԱՄՆ-ի կողմից ռազմական օգնության դադարեցման, Թուրքիայի կողմից մարդասպան ԱԹՍ-ների կիրառման հետաքննության, ռազմական հանցագործության զեկույցի պատրաստման հարցը»։
Հայաստանի Եվրոպական կուսակցության նախագահ Տիգրան Խզմալյանի խոսքերով՝ այս նախաձեռնության հաջողությունը կախված է մեզանից. «Պատերազմի օրերին Միացյալ Նահանգները միգուցե ոչ այնքան հստակ, որքան հիմա՝ առաջարկում էին և՛ խաղաղապահներ և՛ Արցախի ճանաչում։ Մեզ դա հայտնի է, դա եղել էր հոկտեմբերի վերջին։ Հայտնի է նաև, որ Կրեմլի ճնշման տակ, չգիտեմ ինչ հանցավոր պահանջների պատճառով՝ հայկական ռազմաքաղաքական ղեկավարությունը մերժեց դա»,-«Առաջին լրատվական»-ի հետ զրույցում ասաց նա։
Մեկ տարի անց, Խզմալյանի խոսքերով, Կոնգրեսի կարևորագույն երկու՝ հետախուզության և զինված ուժերի հանձնաժողովները, որոնք ղեկավարում են Ադամ Շիֆն ու Ռոբերտ Մենենդեսը՝ Կաիլֆորնիայի երկու դեմոկրատ կոնգրեսականներ, հետաքննում են պատերազմի ընթացքը, դրա պատճառներն ու կատարված հանցանքները․«Եթե Հայաստանը՝ Հայաստանի կառավարությունը, ռազմաքաղաքական ղեկավարությունը, այս պատմական պահին իր մեջ խիզախություն ու պատասխանատվություն գտնի ու արձագանքի Միացյալ Նահանգների այս ուղերձին, ապա մենք կստանանք այն նույն օգնությունը, որը հենց հիմա ստանում է Ուկրաինան, որը ստացել էր Վրաստանը։ Մենք կստանանք պաշտպանություն, զարգացման և ապագա հաղթանակների երաշխիքը»։
Ըստ մեր զրուցակցի՝ եթե մենք դա չանենք, ապա մեղավորը միայն մենք ենք․«Հիմա արդեն ամեն ինչ կախված է մեզնից։ Եթե պատերազմի ժամանակ կարելի է պատկերացնել, թե ինչպիսի շանտաժի ու սպառնալիքների ներքո է գտնվում ղեկավարությունը, որն այնուամենայնիվ ընդունեց անթույլատրելի որոշում՝ մերժելով այդ առաջարկները, հիմա որևէ արդարացում չի լինի»։
Դիտարկմանը, թե հաճախ մենք բանաձևերից, դատապարտող կոչերից զատ ռեալ գործողություններ չենք տեսնում, արդյոք հնարավոր է այս դեպքում սպասել ռեալ քայլերի Միացյալ Նահանգների կողմից, Տիգրան Խզմալյանը պատասխանեց․«Այդ հարցի պատասխանը շատ հեշտ է ստանալ, եթե մենք նայենք, թե հենց հիմա ինչպիսի ռազմական օգնություն է ցուցաբերում Միացյալ Նահանգները Ուկրաինային ու Վրաստանին։ Այսինքն՝ մեր հարևան երկրները ԱՄՆ-ից ստանում են ոչ թե խոստումներ, այլ շատ կոնկրետ ռազմական օգնություն։ Միացյալ Նահանգների նավերը կանգնած են Բաթումում և Փոթիում, Միացյալ Նահանգների օդանավերը հսկայական քանակությամբ զենք են բերել ու շարունակում են բերել Ուկրաինա։ Բացի այդ՝ Մոլդովայի նման երկիրը ստանում է Եվրամիության կողմից օգնություն, երաշխիքներ։ Հենց Հայաստանն արդեն ստացել է 3 միլիարդ դոլարի չափով Եվրոպական միության ֆինանսական օգնություն կամ դրա երաշխիքները։ Էլ ի՞նչ է մեզ պետք, որ հավատանք։ Քրիստոսի կյանքում կար մի առաքյալ՝ Թովմաս, որն անպայման մատով էր ուզում շոշափել Քրիստոսի վերքերը և մինչև մատը չմտցրեց վերքի մեջ՝ չհավատաց։ Միթե մենք այդ Թովմասի նման ենք, էլ ի՞նչ է մեզ պետք հավատալու համար, որ մեզ կօգնեն։ Ամեն ինչ արդեն ակնհայտ է, ես այլ պատասխան չեմ գտնում»։
