Ժամեր անց ֆուտբոլի Հայաստանի ազգային հավաքականը վերջին հանդիպումը կանցկացնի 2022 թվականի աշխարհի առաջնության ընտրական փուլում Վազգեն Սարգսյանի անվան «Հանրապետական» մարզադաշտում հյուրընկալելով աշխարհի քառակի չեմպիոն Գերամնիային։ Մրցաշարային առումով ոչինչ չորոշող խաղում մեր ֆուտբոլիստները այնուամենայնիվ փորձելու են լավ խաղ ցուցադրել։ Այս մասին երեկ հայտարարեց Հայաստանի հավաքականի գլխավոր մարզիչ Խոակին Կապառոսը։ «Նման իրավիճակներում ֆուտբոլիստներն առաջինն են, որ իրենք մոտիվացնում են իրենց, որովհետև առաջինն իրենք են զգում պարտության դառնությունը: Հյուսիսային Մակեդոնիայի հետ խաղից սպասելիքները մեծ էին: Խոսել ենք նրանց հետ: Բոլորն էլ գիտեն, որ մեզ դժվարին խաղ է սպասվում վաղը», -ասել է իսպանացի մասնագետը:
Վերջինս անդրադառնալով իր հնարավոր հրաժարականի մասին ասեկոսեներին նշել էր, որ նման հարց չի քննարկվել և իրենք խոսել են ապագայի և ծրագրերի մասին։ Փաստորեն, ընտրական փուլի վերջին հանդիպումից ընդառաջ Կապառոսը տվեց գլխավոր հացերից մեկ պատասխանը։ Իսպանացի մասնագետը չի պատրստվում ժամանակից շուտ հեռանալ Հայաստանի հավաքականից և գալիք տարի հենց նրա գլխավորությամբ մեր ընտրանին ելույթ կունենա Ազգերի լիգայի B դիվիզիոնում և Եվրոպայի առաջնության ընտրական փուլում։ Հիշեցնենք, որ այս տարի ՀՖՖ-ն երկրարաձգել էր Կապառոսի հետ պայմանագիրը մինչև 2022 թվականի ավարտը։ Անկախ այսօրվա խաղի արդյունքից մեր հավաքականի ելույթը ընտրական մրցաշարում կարելի է ձախողված համարել։ Ազգային թիմի առաջ խնդիր էր դրված նվաճել աշխարհի առաջնության եզրափակիչ փուլի ուղեգիր, որը չստացվեց։ Ամեն դեպքում այսօր մեր հավաքականը մեկ կարևոր խնդիր պետք է լուծի։ Այն է կրկին չխայտառակվել «Հանրապետականում»։ Կարծում ենք ոչ ֆուտբոլային հաշվով պարտությունից հետո բարոյապես միանգաայն դժվար կլինի շարունակել աշխատանքը։ Կապառոսը լիահույս է, որ իր գլխավորած թիմը գոնե չի տապալվի։ Հայաստանի հավաքականի հետ խաղի մասին երեկ խոսել էր նաև Գերմանիայի գլխավոր մարզիչ Հանս-Դիտեր Ֆլիկը զարմանալիորեն դրական գնահատականներ հնչեցնելով մեր ազգային թիմի մասին։
«Ունենք շատ լավ թիմ, որին վստահում եմ: Իմ ու խաղացողների հարաբերությունները շատ լավն են: Մեզ ժամանակ է հարկավոր նոր մտքերն ու փիլիսոփայությունը կյանքի կոչելու համար: Խաղադաշտում կտեսնեք թիմ, որն ամեն ինչ անում է հաղթանակի համար:Հայաստանի հավաքականը կարողանում է պրեսինգի դիմել ու լավ հակագրոհել: Առջևի գծում նրանք ունեն արագ խաղացողներ, որոնք կարող են անակնկալի բերել: Այդ պատճառով պետք է փորձենք գնդակ չկորցնել: Բոլորս գիտենք, թե որքան արագ ու տեխնիկապես լավ պատրաստված խաղացողներ են Հենրիխ Մխիթարյանն ու Սարգիս Ադամյանը:Առջևում ունենք 2 կարևոր հանդիպումներ: Ցանկանում ենք 9 միավոր վաստակել ընտրական փուլի այս հատվածում: Դա մեր նպատակն է», -նշել էր գերմանացի մասնագետը։