«Երևանի պետական համալսարան» հիմնադրամի հոգաբարձուների նորընտիր խորհուրդը հայտարարել է բաց մրցութ ԵՊՀ կառավարիչ-ռեկտորի (այսուհետ՝ ռեկտորի) թափուր պաշտոնի համալրման համար՝ ներկայացնելով մրցույթի մասնակցության պահանջները ու անհրաժեշտ փաստաթղթերը։ Ուշագրավն այն է,որ միայն երեք տարի անց իշխող ուժին հաջողվեց սահմանել մրցույթ ռեկտորի պաշտոնի համար։
Հիշեցնենք,որ ԵՊՀ նախկին ռեկտոր Արամ Սիմոնյանի աղմկահարույց, կոռուպցիոն բնույթի քրեական մեղադրանքով հեռացումից հետո իշխանության ԺՊ-ն այդպես էլ չկարողացավ փոխել ԵՊՀ-ում մթնոլորտն ու քաղաքականացվածության խնդիրը և անգամ չկարողացավ նոր ռեկտորի ընտրության շուրջ համաձայնություն ստեղծել, և միայն օրեր առաջ իշխող ուժը, հոգաբարձուների խորհրդի նոր կազմ ընտրելով, կարողացավ հայտարարել ռեկտորի թափուր տեղի համար մրցույթ։ Ինչպես գիտենք, ԵՊՀ հիմնադրամի հոգաբարձուների խորհրդի նախագահ ընտրվեց փոխվարչապետ, ՔՊ վարչության նախագահ Սուրեն Պապիկյանը, ինչը միանշանակ չընդունվեց՝ իշխող ուժին մեղադրելով, որ այս գործընթացը նախկին իշխանության ընդունած օրենքով, որդեգրած մոտեցումներով ԵՊՀ-ն իրեն ենթարկեցնելու, իր քաղաքական շահերին ծառայեցնելու նպատակ է հետապնդում։
Նախարարն էլ, ի պատասխան հնչող քննդատության, ասաց, որ հիմնական խոչընդոտը իշխանության կողմից 2019-ից մշակված «Բարձրագույն կրթության և գիտության մասին» օրենքի նախագծի՝ բուհերի կառավարման փոփոխությանը վերաբերող դրույթների մերժումն էր ՍԴ-ի կողմից։
«Առաջի լրատվական»-ի հետ զրույցում ԲՈԿ նախկին նախագահ Սմբատ Գոգյանը կարծիք հայտնեց, որ գործընթացի ձգձգումը և խորդուբորդ ընթացքը կապված էր խնդիրը քաղաքականացնելու, թեև համոզված է, որ անկեղծ ցանկություն կար ապաքաղաքականացնելու, բայց թե ինչու չստացվեց, կդժվարանա կոնկրետ պատճառներ նշել։ Այնուամենայնիվ, ըստ Գոգյանի, լավ է, որ վերջապես այդ հարցը լուծում կստանա։ Գոգյանի պատկերացմամբ՝ խուսափելու համար քաղաքական պաշտոնատար անձերի նշանակումից՝ իշխող ուժը պետք է արագ, երբ դեռ չկար քաղաքականացվածության խնդիր, առանց բովանդակային հարցերի մասին մտածելու, սահուն կերպով օրենքը փոփոխության ենթարկեր, նշանակեր իր կողմից նոր ռեկտոր, ով կղեկավարեր ոչ երկար՝ երեք տարի ժամկետով, կկատարեր փոփոխությունները՝ առանց վերընտրվելու նպատակի, քաղաքական առումով մթնոլորտը կբարելավեր և կհեռանար, որից հետո միայն կանցկացվեր ռեկտորի պաշտոնի համար մրցույթ։ Սակայն այդպիսի որոշում չկայացվեց ժամանակին; Գործընթացը թողնվեց էվոլյուցիոն զարգացման հույսին և ունեցանք այս արդյունքը։ Մինչդեռ,ըստ Գոգյանի, պետք է լիներ ճգնաժամային կառավարում․ նշանակված ղեկավարները կառավարեին այդ օրակարգով և այդ ժամկետով ու հեռանային։ Հարցին, թե կա՞ն արդյոք նախկին կարգերին վերադառնալու վտանգներ, երբ, ըստ էության, ռեկտորի ընրությունը կրելու է քաղաքական բնույթ, Գոգյանն ասաց, որ անցումային փուլի համար նորմալ են այսպիսի զարգացումները։ «․ԵՊՀ-ում կային ներքին անառողջ ուժեր, որոնք անընդհատ պայքար էին մղում, հակամարտության մեջ էին մտնում իշխանության հետ, վերջինս էլ կարողացավ այսպես հաղթել՝ այսպիսի իրավիճակային լուծում գտնելով։ Պետք է սպասենք, տեսնենք՝ ինչպես կաշխատի,- ասաց մեր զրուցակիցը,ապա ավելացրեց․-դևի գլուխը կկտրվի, բայց չգիտենք՝ հետո նոր դև կծնվի թե ոչ»։ Մենք հարցրինք՝արդյոք կա այդպիսի մտավախություն, Գոգյանը պատասխանեց՝ նման մտավախություն չունի, որ այս ամենը սպասելի, նորմալ գործընթաց է։
Լուսանկարը՝ Photolure-ի