Ֆրանսիայում հանդիպել են Հայաստանի և Ադրբեջանի արտգործնախարարները: Այդ մասին հայտնել է Ֆրանսիայի ԱԳՆ-ը: Ինչպես հայտնի է, Հայաստանի արտգործնախարարը Փարիզ է մեկնել Յունեսկոյի համաժողովի առիթով: Նույն առիթով էլ Ֆրանսիայում է Ադրբեջանի արտգործնախարարը: Նրանց հետ առանձին հանդիպումներ է ունեցել նաև Ֆրանսիայի արտգործնախարար Լը Դրիանը: Հայաստանի և Ադրբեջանի արտգործնախարարների հանդիպումը տեղի է ունեցել ԵԱՀԿ Մինսկի խմբի երեք համանախագահների մասնակցությամբ: Մասնակցել է նաև ԵԱՀԿ գործող նախագահի մշտական ներկայացուցիչ Կասպշիկը:
Տեղի ունեցածը Միրզոյան-Բայրամով ձևաչափով երկրորդ հանդիպումն է: Առաջինն ինչպես հայտնի է տեղի էր ունեցել Նյու Յորքում, ՄԱԿ ԳԱ շրջանակում: Դրանից հետո ՌԴ արտգործնախարար Լավրովը հայտարարեց, որ համաձայնեցվել է ռեգիոն համանախագահ եռյակի այցը: Սակայն, մեկուկես ամիս անց տեղի է ունենում «ռեգիոնից դուրս» նոր հանդիպում համանախագահների և արտգործնախարարների մասնակցությամբ, ինչը հուշում է, որ համանախագահների այցի համար ամեն ինչ չէ, որ համաձայնեցված էր, կամ առաջացել են նոր հարցեր և հետևաբար նոր անհամաձայնություններ: Այդ առումով ինչ բովանդակություն ու ընթացք է ունեցել Փարիզի հանդիպումը, դեռ անորոշ է, մանրամասներ չկան: Միևնույն ժամանակ, ուշադրության է արժանի այն, որ Փարիզում Հայաստանի ու Ադրբեջանի արտգործնախարարների հետ առանձին հանդիպումներից հետո, Ֆրանսիայի արտգործնախարարը հանդիպում է ունենալու ՌԴ արտաքին գործերի նախարար Լավրովի և պաշտպանության նախարար Շոյգուի հետ:
Լիբիայի հարցերով խորհրդաժողովի շրջանակում լինելու է Ֆրանսիայի և ՌԴ արտաքին գործերի ու պաշտպանության նախարարների ընդհանուր ձևաչափի հանդիպում, որի ընթացքում քննարկվելու է նաև արցախյան հարցը և ԵԱՀԿ Մինսկի խմբի շրջանակում երկու երկրների աշխատանքը: Հատկանշական է այն, որ փարիզյան հանդիպումները տեղի են ունենում Մոսկվայի նախաձեռնությամբ Փաշինյան-Պուտին-Ալիև եռակողմ հանդիպման կամ տեսակոնֆերանսի վերաբերյալ տեղեկատվական ակտիվ շրջանառության ֆոնին: Սա թույլ է տալիս դիտարկել հավանականություն, որ այդուհանդերձ այդ եռակողմ հանդիպումը իրականացվում է նաև Ֆրանսիայի ներգրավվածությամբ, ինչի վկայություն է այն, որ այս օրերին Հայաստանի ու Բաքվի արտգործնախարարների հետ հեռախոսազրուցներ ունեցավ նաև ՌԴ արտգործնախարարը, իսկ մինչ անորոշ ժամկետում կլինի Փաշինյան-Պուտին-Ալիև եռակողմ հանդիպում, Փարիզում համանախագահների ներկայությամբ եղավ հանդիպում արտգործնախարարների միջև: