Ռուսաստանի նախագահ Վլադիմիր Պուտինն ու Գերմանիայի կանցլերի պաշտոնակատար Անգելա Մերկելը մեկ օրվա ընթացքում արդեն երկրորդ անգամ հեռախոսազրույց կունենան՝ քննարկելու Լեհաստանի ու Բելառուսի սահմանին փախստականներով պայմանավորված իրավիճակը: Այս մասին հայտնել է Bloomberg-ը:
«Պուտինն ու Մերկելը կրկին Բելառուսի հարցը կքննարկեն մի քանի ժամից»,- ասվում է գործակալության տեղեկատվության մեջ:
Նոյեմբերի 10-ին տեղի ունեցած հեռախոսազրույցում Մերկելը Պուտինին խնդրել էր ազդեցություն գործել Բելառուսի իշխանությունների նկատմամբ՝ կապված փախստականների հարցի հետ, ովքեր այդ երկրի տարածքով փորձում են մուտք գործել Եվրամիությունը: Համաձայն Կրեմլի հաղորդագրության՝ Պուտինն առաջարկել է Մերկելին միգրացիոն ճգնաժամի վերաբերյալ խնդիրը քննարկել ԵՄ անդամ երկրների ու Մինսկի միջև շփումների շրջանակում:
Բելառուսական կողմի տվյալներով՝ Լեհաստանի հետ սահմանին կա Մերձավոր Արևելքի և Աֆրիկայի երկրներից շուրջ երկու հազար փախստական, այդ թվում և զգալի թվով կանայք ու երեխաներ: Փախստականներից ոմանք փորձեր են արել ապօրինի հատել սահմանն ու մտնել Լեհաստան:
