Մոսկվան կարևոր է համարում Մինսկի խմբի համանախագահ եռյակի Ղարաբաղ այցերի շուտափույթ վերսկսումը, հայտարարել է ՌԴ արտգործնախարարության խոսնակ Մարիա Զախարովան: Նա նշել է, որ համանախագահության ձևաչափն ունի միջազգային լայն աջակցություն: Ըստ նրա, Մոսկվան կարևոր է համարում «եռյակի» ջանքը հատկապես ռեգիոնի սոցիալ-տնտեսական և մարդասիրական խնդիրների լուծման տեսանկյունից:
Սեպտեմբերի վերջին Նյու Յորքում ՄԱԿ ԳԱ շրջանակում Մինսկի խմբի համանախագահների և Հայաստանի ու Ադրբեջանի արտգործնախարարների հանդիպումներից հետո առաջինը ՌԴ արտգործնախարար Լավրովն էր հայտնել, թե համաձայնեցվել է ռեգիոն համանախագահների այցի հեռանկարը, այդ թվում Լեռնային Ղարաբաղ, ինչպես նշել էր Լավրովը: Լավրովը ժամկետ չէր նշել, սակայն «համաձայնեցված» հեռանկարի համար այն կարծես թե արդեն բավականին ձգվում է: Անցել է մոտ մեկուկես ամիս, սակայն ոչ միայն այց չկա, այլ նաև տեղեկություն, թե երբ կլինի:
Հայաստանի վարչապետ Նիկոլ Փաշինյանն օրերս Հանրային հեռուստաընկերությանը տված հարցազրույցում հայտարարել էր, որ համանախագահների այցի հետ կապված ըստ ամենայնի խնդիր կա Ադբեջանում: նա ասել էր, որ այդ տպավորությունն է ամերիկացի համանախագահ Էնդրու Շեֆերին իր ուղղած հարցի պատասխանից: Շեֆերը Հայաստան էր այցելել ամերիկյան դիվանագիտական ներկայացուցչությունների ռեգիոնալ հավաքի շրջանակում: Եթե խնդիր կա Ադրբեջանում, ապա ինչի՞ց է այն ծագել կամ ինչն է այն, եթե հաշվի առնենք, որ Լավրովը հայտարարել էր համաձայնեցվածության մասին: Ուրեմն, խնդիրն առաջացել է հետո, թեև հայտնի չէ՝ որն է այն: Իսկ արդյո՞ք խնդիրը Ադրբեջանում չէ, այլ գործնականում հենց համանախագահների շրջանակում: Խոսքն այն մասին չէ, որ Ադրբեջանը սիրով սպասում է համանախագահներին, բայց եռյակի մեջ կան չհամաձայնեցված հարցեր կամ շահեր:
Ադրբեջանը անշուշտ չի սպասում, բայց Բաքուն հազիվ թե գնա դիմադրության, եթե համանախագահ «եռյակը» իսկապես կայացնի ռեգիոնալ այցի մասին քաղաքական որոշում: Չի բացառվում իհարկե, որ Բաքուն ունի իր պայմանը, օրինակ, որ համանախագահները ոչ թե Հայաստանից, այլ Ադրբեջանից մուտք գործեն Արցախ: Ընդ որում, պետք է նկատել, որ դա աննախադեպ չէ: Կարգավորման գործընթացի նախորդ փուլերում եղել է, որ համանախագահները մուտք գործեն Արցախ Ադրբեջանից: Սակայն, այդ ընթացքում իհարկե բացարձակապես այլ էր քաղաքական մթնոլորտն ու միջավայրը, որովհետև այլ էր ստատուս-քվոն: Այժմ ամեն ինչ հակառակն է և Հայաստանի համար խիստ կարևոր է, որպեսզի համանախագահները Արցախ մտնեն հենց Հայաստանի տարածքից: Կա՞ այդ հարցում փոխհամաձայնություն Մինսկի խմբի համանախագահ երկրներում, թե՞ դրա բացակայությունից է, որ չկա որոշակիություն եռանախագահների ռեգիոնալ այցի կապակցությամբ:
