Թբիլիսիում նոյեմբերի 10-ից մինչեւ դեկտեմբերի 8-ը կանցկացվի բարոկո դարաշրջանի երաժշտության թվով յոթերորդ միջազգային փառատոնը եւ, ավանդույթի համաձայն, Վրաստանի մայրաքաղաքի կհավաքի հայտնի վրացի եւ արտասահմանյան արտիստների:
Ծրագրում «Սիմֆոնիետա Վրաստան» կամերային նվագախմբի, «Բասիանի» վրացական ժողովրդական երգի անսամբլի, Գեորգի Ալեքսիեի Թբիլիսիի ժամանակակից բալետի եւ այլոց ելույթներն են: Օտարերկրյա հյուրերի թվում են՝ իտալացի երգիչ եւ պարող Վինչենցո Կապեցուտոն, “I Bassifondi” իտալական տրիոն եւ ֆրանսիացի երգչուհի, մեցո-սոպրանո Նատալի Պերեզը:
Փառատոնը կբացվի Շ.Ռուսթավելու անվան ազգային թատրոնի փոքր բեմում՝ «Վրացական եւ եվրոպական եկեղեցական երաժշտություն» խորագիրը կրող համերգով: Երեկույթին կհնչեն Stabat Mater-ը եւ Nisi Dominus կանտատան (Անտոնիո Վիվալդի), ինչպես նաեւ ավանդական վրացական եկեղեցական երգեր:
Կազմակերպիչները հիշեցնում են, որ բոլոր համերգները կանցնեն քովիդ-հանձնարարականների պահպանմամբ՝ դիմակներ, ախտահանում, սոցիալական հեռավորություն: Թբիլիսիի ամենամյա բարոկո երաժշտության միջազգային փառատոնը հիմնվել Է 2015 թվականին Թբիլիսիի «Սիմֆոնիետա Վրաստան» պետական կամերային նվագախմբի կողմից՝ Վրաստանի կրթության, գիտության, մշակույթի եւ սպորտի նախարարության աջակցությամբ:
Տարբեր տարիների փառատոնի հյուրերն են դարձել բարոկո երաժշտության լավագույն կատարողները՝ իսպանացի Ժորդի Սավալը, իտալացի ֆագոտահար Սերջիո Ազոլինին եւ թավջութակահար Դավիթ Ամադիոն, գերմանացի ջութակահարուհի Քրիստին Բուշը, ֆրանսիացի կլավեսինահար Ժան Ռոնդոն, «Հին երաժշտության Բեռլինի ակադեմիայի» նվագախումբը եւ շատ ուրիշներ, հաղորդել Է Sputnik-ը: