Միշտ չէ, որ համապետական ընտրությունների արդյունքները նոյւնապես պրոյեկտվում են ՏԻՄ ընտրություններում, որովհետև ՏԻՄ ընտրություններն ունեն մի շատ կարևոր առանձնահատկություն, շատ դեպքերում դրանք անձնավորվում են: Այս մասին «Առաջին լրատվական»-ի հետ զրույցում նշեց Շրջակա միջավայրի նախարար Ռոմանոս Պետրոսյանը՝ անդրադառնալով նրան, որ ՏԻՄ ընտրություններում մի շարք համայնքներում ՔՊ-ն պարտություն կրեց:
«ՏԻՄ ընտրություններում մարդիկ թեկնածուներին անձնական որակների, անցած ճանապարհով են չափում, և կուսակցական կամ թիմային պատկանելիությունը ետին պլան է մղվում: Այդպիսին էին վերջին ընտրությունների արդյունքները: Բնականաբար, քաղաքականությունն ընթացիկ պրոցես է և բնականաբար, ցանկացած կուսակցություն ինստիտուցիոնալ մոտեցում պետք է ունենա շտկելու, վերախմբավորելու, հետևություններ անելու: Բայց նաև պետք է շեշտեմ, որ ՔՊ-ն որևէ կերպ իր առջև խնդիր չի դրել աներկբայորեն բոլոր համայնքներում հաղթել և ունենալ ՔՊ-ական համայնքապետեր: Մեր գերխնդիրն այն է, որ ժողովրդի քվեն իրացվի»,-ասաց նա:
