Գլոբալիզացիայի եւ տարածաշրջանային համագործակցության վերլուծական կենտրոնի նախագահ Ստեփան Գրիգորյանը կարծում է, որ Հայաստանը պետք է պատրաստ լինի բանակցել ու քննարկել ինչպես Հայաստանի ու Ադրբեջանի միջև սահմանազատման ու սահմանագծման հարցերը, այնպես էլ ճանապարհների բացումը: Երևանում նոյեմբերի 6-ին կայացած «Միջա՞նցք, թե՞ ճանապարհ, ո՞րը պետք է լինի Հայաստանի դիրքորոշումը» թեմայով փորձագիտական քննարկման ժամանակ Ստեփան Գրիգորյանը նշեց, որ այդ գործընթացին զուգահեռ ոչ մի դեպքում պետք է բաց չթողնել Ադրբեջանի սխալները:
«Ադրբեջանը միջազգային նորմերը խախտեց, ուրեմն զուգահեռ պետք է լինեն դատավարական պրոցեսներ: Մենք պետք է անընդհատ դեմոկրատական երկրների հետ աշխատանք տանենք: Ինչպես գիտենք, Բայդենը Հայաստանին հրավիրել է մասնակցելու դեմոկրատական աշխարհի գագաթնաժողովին: Իմ կոչն է անպայման ելույթով հանդես գալ և ներկայացնել ճշմարտությունը: Այո, Ադրբեջանը պետք է սանկցիաների տակ ընկնի պատերազմը սկսելու (խմբ.- արցախյան վերջին պատերազմ), Լեռնայի Ղարաբաղը մասսայական ռմբակոծելու, հանցագործություններ կատարելու պատճառով, զուգահեռ պատրաստ լինել խոսելուն»,-ասաց Ստեփան Գրիգորյանը:
