12 տարվա ընդմիջումից հետո Հայաստանը կրկին մասնակից ունի բռնցքամարտի աշխարհի առաջնության եզրափակչում: Վերջին անգամ Հայաստանն աշխարհի առաջնության եզրափակչի մասնակից ունեցել էր 2009 թվականին, երբ Անդրանիկ Հակոբյանը նվաճեց արծաթե մեդալ: Սերբիայում ընթացող աշխարհի առաջնության կիսաեզրափակչում գերծանր քաշային Դավիթ Չալոյանը երեկ տպավորիչ հաղթանակ տոնեց: Մեր բռնցքամարտիկը մեծ առավելությամբ պարտության մատնեց երիտասարդների Եվրոպայի կրկնակի չեմպիոն, Տոկիոյի Օլիմպիական խաղերի մասնակից, ադրբեջանցի Մուհամեդ Աբդուլաևին: Առաջին ռաունդի մեկնարկից Չալոյանը մեծ ճնշում էր գործադրում մրցակցի նկատմամբ՝ ապացուցելով, որ իրականում ինքն է մենամարտի ֆավորիտը: Նույն պատկերն էր նաև երկրորդ ռաունդում: Մեր մարզիկը վարելով անհամեմատ ավելի ակտիվ մարտ ադրբեջանցուն թույլ չտվեց լուրջ գրոհներ ձեռնարկել։ Երկրորդ ռաունդում ևս Չալոյանը հաղթեց զգալի առավելությամբ:
3-րդ ռաունդում գյումրեցի մարզիկը արդեն տակտիկական մենամարտ անցկացրեց վստահորեն պահպանելով առավելությունը: Մրցավարների որոշմամբ Չալոյանին հաղթանակ շնորհվեց 5։0 հաշվով։ Աշխարհի առաջնությունում մենք երկու մենամարտ ենք ունեցել ադրբեջանցի բռնցքամարտիկների հետ և երկուսում էլ հաղթանակ ենք տոնել: Ավելի վաղ ադրբեջանցի բռնցքամարտիկի նկատմամբ գեղեցիկ հաղթանակ էր տոնել նաև Հովհաննես Բաչկովը: Ինչևէ, այսօր երեկոյան Չալոյանը ոսկե մեդալի համար կմենամարտի ռուսաստանցի Մարկ Պետրովսկիի հետ։ Վերջինս 22 տարեկան է և ինչպես Չալոյանը մեծահասակների մրցաշարերում լուրջ արդյունքների չի հասել, ավելին, Պետրովսկին մեդալներ չի նվաճել նաև երիտասարդական միջազգայն մրցաշարերում։ Այս տարի նրան հաջողվել է դառնել Ռուսաստանի չեմպիոն և ընդգրկվել ազգային հավաքականում։ Պետրովսկին և Չալոյանը դասվում են Սերբիայի աշխարհի առաջնության գլխավոր հայտնությունների շարքում։ Հավատում ենք, որ այսօր կայանալիք հայ-ռուսական ոսկե դիմակայությունում մեր գյումրեցի մարզիկը իր կարիերայի կարևորագույն հաղթանակը կտանի։ Նշենք, որ անկախ Չալոյանը պայքարը սկսել էր 1/6 եզրափակչից, որտեղ 4:1 հաշվով հաղթել է Ուկրաինան ներկայացնող Ցոնթե Ռովագային: 1/8 եզրափակչում հայ մարզիկը 4:1 հաշվով հաղթել էր կոլումբացի Կրիստիան Սալսեդո Կոդասիին, քառորդ եզրափակչում էլ տպավորիչ հաղթանակ տարել ուզբեկ Լազիզբեկ Մուլուջոնովի նկատմամբ։ Աշխարհի առաջնությունում երեկ Հայաստանի համար առաջին մեդալը նվաճեց օլիմպիական խաղերի բրոնզե մեդալակիր Հովհաննես Բաչկովը։
Վեջինս կիսաեզրափակչում մենամարտեց աշխարհի կրկնակի չեմպիոն, օլիմպիական չեմպիոն կուբացի Էնդի Գոմես Կրուսի հետ։ Ունենալով նկատելի առավելություն կուբացի մարզիկը հաղթեց 5։0 հաշվով։ Նշենք, որ այս քաշային կարգում Կրուսը ընդգծված ֆավորիտ է և տևական ժամանակ որևէ բռնցքամարտիկի չի հաջողվում լուրջ դիմադրություն ցույց տալ նրան։ Հավանականությունը մեծ է, որ կուբացին այսօր կհռչակվի աշխարհի եռակի չեմպիոն։ Հայ բռնցքամարտիկն իր հերթին երրորդ անգամ նվաճեց աշխարհի առաջնության բրոնզե մեդալ։ Բաչկովը պայքարը սկսել է 1/16 եզրափակչից, որտեղ տպավորիչ հաղթանակ է տարել ադրբեջանցի Մալիկ Հասանովի նկատմամբ: 1/8-րդ եզրափակչում էլ 3:2 հաշվով առավելության է հասել Իտալիայի ներկայացուցիչ Ջիանլուիջի Մալանգայի նկատմամբ: Քառորդ եզրափակչում մրցավարների որոշմամբ գյումրեցի բռնցքամարտիկը 2:3 հաշվով պարտվել էր թաիլանդի Սոմչայ Վոնգսուվանին, բայց հայկական կողմի բողոքարկումից հետո հաղթանակը շնորհվել է նրան: Չի բացառվում, որ երեկվա մենամարտը Բաչկովի համար վերջինն էր սիրողական բռնցքամարտում։
Տիտղոսակիր մարզիկը մտադիր է կարիերան շարունակել պրոֆեսիոնալ ռինգում։ Բելգրադի աշխարհի առաջնությունում Հայաստանը ներկայացավ 11 մասնակցով։ Ավելի վաղ պայքարից դուրս էին մնացել Սեյրան Եղիկյանը (48 կգ), Արթուր Հովհաննիսյանը (51 կգ), Վահե Բադալյանը (54 կգ), Արթուր Բազեյանը (57 կգ), Կարեն Տոնականյանը (60 կգ), Գուրգեն Մադոյանը (67 կգ), Արման Դարչինյանը (71 կգ), Համբարձում Հակոբյանը (80 կգ) եւ Նարեկ Մանասյանը (92 կգ):
