Հայաստանի խորհրդարանում 44-օրյա պատերազմի հանգամանքներն ուսումնասիրող քննիչ հանձնաժողով է ձևավորվում, որտեղ ընդգրկված կլինեն նաև արտախորհրդարանական ուժերի ներկայացուցիչները: Հնարավոր է, հանձնաժողովում ներկայացված լինեն նաև Արցախից ներկայացուցիչներ, նաև փորձագետներ, զինվորականներ: Արդյոք Արցախի քաղաքական ուժերը մտադրություն ունեն մասնակցել այս հանձնաժողովի աշխատանքներին, թե ոչ:
Այս խնդրի շուրջ «Առաջին լրատվական»-ի հետ զրույցում Արցախի ԱԺ «Միասնական» հայրենիք» խմբակցության պատգամավոր, ԱԺ պաշտպանության, անվտանգության և օրինապահության հարցերի հանձնաժողովի նախագահ Սեյրան Հայրապետյանը նշեց. «Մենք միշտ պատրաստ ենք քննարկելու ցանկացած առաջարկություն: Ինչ վերաբերում է մասնակցությանը, ապա կարծում են, որ այն հարցերը, որոնք քննվելու են այդ հանձնաժողովում, եթե Արցախի այս կամ այն պաշտոնատար անձանց կողմից այդ հարցերի վերաբերյալ լինեն օբյեկտիվ ու ռեալ պատասխանը, դա ևս մասնակցություն է: Այն, որ պետք է քննվեն այդ պատերազմի հանգամանքները, և փորձագիտական մակարդակով, և հանրային վերաբերմունքի տեսակետից, դա միանշանակ է: Եթե ինչ-որ ձևով աջակցելու, մասնակցելու կարիք կլինի, սիրով պատրաստ ենք, բայց այս պահին կոնկրետ նման հարց չկա օրակարգում»,-ասաց նա:
Հայրապետյանը հավելեց, որ ամեն դեպքում ամեն ինչ պետք է պարզ դառնա հանրությանը. «Նաև շատ կարևոր է հայտնաբերված թերությունները, սխալները, հանցագործությունները ի հայտ բերվեն, որ հետագայում նման սխալները, բացթողումները չկրկնվեն»:
Նույն խնդրի առնչությամբ, Արցախի ԱԺ ՀՅԴ խմբակցության քարտուղար Վահրամ Բալայանը «Առաջին լրատվական»-ի հետ զրույցում ասաց, որ ճիշտ կլինի, որ Արցախից նույնպես այդ հանձնաժողովի աշխատանքներին մասնակցեն՝ օբյեկտիվ քննություն կատարելու համար. «Այդ մասնակցությունը կարող է լինել նաև փորձագիտական մակարդակով, փորձագետների ներգրավեն, կամ քաղաքական ուժերից: Երկու տարբերակով էլ վատ չի լինի:
Արցախի ներկայացուցիչների մասնակցությունը, համենայնդեպս, հնարավորինս օբյեկտիվություն կհաղորդի, որովհետև մարդիկ, որոնք այստեղ են եղել այդ ժամանակ, ականատես են եղել և որոշակի ինֆորմացիայի են տիրապետում»:
Հարցին, թե ի՞նչ ակնկալիք ունի նման հանձնաժողովի աշխատանքներից, Բալայանը պատասխանեց. «Դա օբյեկտիվ լինել չի կարող, որովհետև կամա թե ակամա այդ գործընթացների պատասխանատուն եղել է իշխանությունը, և հիմա ո՞վ պետք է ում քննի: Կարծում եմ՝ հետագայում երբ կլինի նոր իշխանությունը, նոր հնարավոր կլինի օբյեկտիվ ուսումնասիրություն կատարել: Մարդու բնույթն է այդպիսին, ոչ մեկը չի նպաստի իր սխալները կամ իր կատարած կամ չկատարած գործերը ջրի երես հանելուն: Վերջիվերջո, այն ամենը, ինչ կատարվել է այդ 44 օրերի ընթացքում թե ռազմաճակատում, թե մինչև պատերազմը, այդ ամենի պատասխանատուն օրվա իշխանություններն են, և հազիվ թե այս իշխանությունների օրոք այդ ամենը ջրի երես դուրս գա»: