Սերբիայում ընթացող բռնցքամարտի աշխարհի առաջնությունում Հայաստանն ապահովեց առնվազն երկու բրոնզե մեդալ։ Գերծանր քաշայինների պայքարում քառորդ եզրափակիչում Դավիթ Չալոյանը երեկ մրցեց ուզբեկ Լազիզբեկ Մուլուջոնովի հետ և ծանր պայքարում հաղթելով 3:2 հաշվով դուրս եկավ կիսաեզրափակիչ: Նշենք, որ բռնցքամարտում կիսաեզրափակչում պարտված բռնցքամարտիկներին շնորհվում է բրոնզե մեդալ։ Հավատում ենք սակայն, որ Չալոյանը չի բավարարավի ձեռք բերածով։ Եզրափակչի ուղեգիրը մեր բռնցքամարտիկը վիճարկելու է ադրբեջանցի Մումամադ Աբդուլաևի հետ։ Դավիչ Չալոյանը պայքարը սկսել էր 1/16 եզրափակիչից, որտեղ 4:1 հաշվով հաղթել է Ուկրաինան ներկայացնող Ցոնթե Ռովագային: 1/8 եզրափակիչում մեր մարզիկը 4:1 հաշվով հաղթել էր կոլումբացի Կրիստիան Սալսեդո Կոդասիին:Նշենք, որ Դավիթ Չալոյանն առաջին անգամ է մեծահասակներում մասնակցում աշխարհի առաջնությանը:Նույն Մուլուջոնովի հետ Չալոյանը հանդիպել էր նաեւ 2021 թվականի սեպտեմբերին Մոկսվայում անցկացված բանակայինների աշխարհի առաջնությունում: Կիսաեզրափակիչում Չալոյանը պարտվել էր ուզբեկ բռնցքամարտիկին և բավարարվել բրոնզե մեդալով:
Փաստորեն, երկու ամիս անց հայաստանցի բռնցքամարտիկը տպավորիչ ռևանշի հասավ ուզբեկ մրցակցի նկատմամբ անհամեմատ ավելի մեծ մրցաշարում։ Չալոյանը ադրբեջանցի մրցակցի հետ կմենամարտի նոյեմբերի 4-ին։ Ինչևէ, միանգամայն դրամատիկ ավարտ ունեցավ 63․5 քաշային կարգում մեր հավաքականի առաջատար Հովհաննես Բաչկովի մենամարատը Թաիլանդի ներկայացուցիչ Սոմչայ Վոնգսուվանի դեմ։ Մրցավարների ակնհայտ սխալ որոշմամբ Բաչկովը պարտվել էր 2։3։ Մենամարտից հետո սակայն Հայաստանի բռնցքամարտի ֆեդերացիան բողոքարկել էր մրցավարների որոշումը։ «Բռնցքամարտի աշխարհի առաջնությունում Թաիլանդը ներկայացնող Սոմչայ Վոնգուսավանի հետ մենամարտում մրցավարները անարդարացիորեն հաղթանակը շնորհել էին Թաիլանդը ներկայացնող բռնցքամարտիկին՝ մինչդեռ մեր մարզիկը լավ մենամարտ էր անցկացրել, նկատելի առավելություն ուներ մրցակցի նկատմամբ և իրականում ի նշա հաղթանակի պետք է բարձրացնեին հենց Բաչկովի ձեռքը: Մենամարտից անմիջապես հետո բռնցքամարտի Հայաստանի ֆեդերացիան Հովհաննես Հովսեփյանի գլխավորությամբ բողոքարկել է մրցավարների անարդար որոշումը ու հետամուտ եղել արդարության վերականգմանը: Ի վերջո մրցավարական հանձնաժողովի քննարկումներից հետո արդարությունը վերականգնվել է ու քառորդ եզրափակիչի Բաչկով- Վոնգուսավան մենամարտի հաղթանակը շնորհվել է հայ մարզիկին: Այսպիսով պատմության մեջ առաջին անգամ աշխարհի առաջնությունում հայ մարզիկի նկատմամբ արձանագրած անարդար որոշումը փոխվում է և հաղթանակը վերադարձվում է մեզ: Աշխարհի առաջնության կիսաեզրափակչում Հայաստանը կունենա երկու ներկայացուցիչ: Դա նշանակում է, որ երկու բրոնզե մեդալը ապահովված է: Սա նույնպես բացառիկ երևույթ է հայկական բռնքամարտի պատմության մեջ»- նշված է ՀԲՖ-ի տարածած հայտարարության մեջ:
Ի դեպ, Բաչկովը ռինգում երկրորդ անգամ էր հանդիպում Վոնգսուվանին: 2019 թվականի աշխարհի առաջնության 1/16-րդ եզրափակչում Բաչկովը 4:1 հաշվով հաղթել էր Թաիլանդի ներկայացուցչին:Գյումրեցի բռնցքամարտիկն աշխարհի առաջնությունում պայքարը սկսել էր 1/16եզրափակչից, որտեղ տպավորիչ հաղթանակ էր տարել Ադրբեջանի ներկայացուցիչ Մալիկ Հասանովի նկատմամբ, իսկ 1/8 եզրափակչում Բաչկովը մրցել էր Իտալիայի ներկայացուցիչ Ջիանլուիջի Մալանգայի հետ և 3։2 հաշվով հաղթանակ տոնել:Այսպիսով, աշխարհի առաջնության կիսաեզրափակչում Հայաստանը կունենաերկու ներկայացուցիչ:Հիշեցնենք՝ բռնցքամարտի աշխարհի առաջնությանը Հայաստանը ներկայացված էր 11 մարզիկով։ԱԻԲԱ-ի 75-ամյա պատմության մեջ առաջին անգամ բռնցքամարտի աշխարհի առաջնության մրցանակակիրները կպարգևատրվեն. ընդհանուր առմամբ սահմանվել է 2,6 միլիոն դոլար մրցանակային ֆոնդ։
ԱԱ-ի ոսկե մեդալակիրները կստանան 100, արծաթե մեդալակիրները` 50, իսկ բրոնզե մեդալակիրները` 25 հազարական ԱՄՆ դոլար: