Վաշինգտոնում Ռուսաստանի Դաշնության դեսպան Անատոլի Անտոնովը հայտարարել է, որ վերջին մեկ տարվա ընթացքում Ռուսաստանի և Միացյալ Նահանգների հարաբերություններում դրական տեղաշարժեր են նկատվում: Այդ մասին հայտնում է «ՌԻԱ Նովոստի» լրատվական գործակալությունը՝ վկայակոչելով ռուս դեսպանի խոսքերը:
«ԱՄՆ նախագահ Ջո Բայդենը առանց որևէ նախապայմանի համաձայնեց Ռազմավարական հարձակողական սպառազինության կրճատման պայմանագիրը 5 տարով երկարացնելու մեր առաջարկին: Հունիսին Ժնևում տեղի ունեցավ երկու երկրների առաջնորդների գագաթնաժողովը: Հանդիպումը բավական հագեցած էր և արդյունավետ», – «Դիալոգ Ֆորտ-Ռոս»-ի 10-րդ համաժողովի բացման ժամանակ ասել է Ռուսաստանի դեսպանը:
Անտոնովի խոսքով՝ Մոսկվային և Վաշինգտոնին հաջողվել է կայուն երկխոսություն ձևավորել այդ թվում անվտանգության խորհուրդների և արտաքին քաղաքական գերատեսչությունների համագործակցության ուղղությամբ: Նաև փորձագիտական շփումներ են տեղի ունենում կլիմայական խնդիրների, Արկտիկայի պաշտպանության և զարգացման շուրջ, շարունակվում է փոխգործակցությունը, աճում են առևտրի ծավալները:
ՌԴ նախագահ Վլադիմիր Պուտինը և ԱՄՆ նախագահ Ջո Բայդենը հունիսի 16-ին Ժնևում կայացած հանդիպմանը համաձայնության էին հասել երկկողմ հարաբերությունների վատթարացման պատճառով հետ կանչված դեսպաններին միմյանց մայրաքաղաքներ վերադարձնելու մասին: Մարտ ամսին Մոսկվա հետ կանչված դեսպան Անտոնովը Վաշինգտոն է վերադարձել հուլիսին: