Ռեգիոնալ այցով Կովկաս է ժամանում ԱՄՆ պետքարտուղարի Եվրոպայի և Եվրասիայի գործերով նորանշանակ փոխտեղակալ Էրիկա Օլսոնը, որը այցի շրջանակում նոյեմբերի 2-4-ը կլինի Հայաստանում: Բացի Հայաստանի ղեկավարության հետ հանդիպումներից, որ ամերիկացի դիվանագետի օրակարգում են, Հայաստանում նախատեսվում է նաև մեկ այլ հետաքրքիր միջոցառում, այսպես ասած զուտ ամերիկյան, բայց ռեգիոնալ նշանակության:
Բանն այն է, որ Պետքարտուղարության բարձրաստիճան պաշտոնյայի ռեգիոնալ այցի հայաստանյան մասում նախատեսված է նաև անցկացնել Կովկասում ԱՄՆ դիվանագիտական ներկայացուցչությունների ղեկավարների հավաք: Երևանում հավաքվելու և Էրիկա Օլսոնի հետ ամերիկյան ռեգիոնալ քաղաքականության հարցեր են քննարկելու Վրաստանում և Ադրբեջանում ԱՄՆ դեսպանները: Բնականաբար, լինելու է նաև Հայաստանում ԱՄՆ դեսպանը: Հետաքրքիր է նաև այն, որ հանդիպմանը ներկա է լինելու Մինսկի խմբի ամերիկացի համանախագահ Էնդրյու Շեֆերը, ինչպես նաև ԱՄՆ ՄԶԳ Վաշինգտոնի գրասենյակի ղեկավարի տեղակալը: Ինչո՞ւ է Հայաստանն ընտրվել ամերիկյան ռեգիոնալ դիվանագիտության այսպես ասած «շտաբնային հավաքի» վայր: Ունի՞ այդ հանգամանքը ինչ-որ հատուկ ուղերձի նշանակություն, թե՞ պարզապես այդպես է նպատակահարմար գտնվել ֆունկցիոնալ առումով: Ասել, թե սա վճռորոշ հանգամանք է, իհարկե կլինի միամտություն: Ի վերջո, ամերիկացի դիվանագետները քննարկելու են ռեգիոնալ քաղաքականությունը ԱՄՆ ռազմավարության շիրջանակում և էական չէ, թե Կովկասի հատկապես որ մայրաքաղաքում է լինելու այդ քննարկումը: Ի վերջո, այն պետք է լիներ երեքից մեկում և ցանկացածի պարագայում հնարավոր էր հարցնել, թե ինչու հենց այդ մեկում:
Մյուս կողմից, իհարկե առավել տրամաբանական կարող էր դիտվել Թբիլիսիի ընտրությունը, հաշվի առնելով թե այսպես ասած հայ-ադրբեջանական կոնֆլիկտն ու Վրաստանի «չեզոքությունը», առավել ևս միջնորդական հայտի տրամաբանությամբ, թե վրաց-ամերիկյան հարաբերության սերտությունը: Բայց, Նահանգներն ընտրել է Երևանը և դա իհարկե բախտորոշ չէ, բայց հետաքրքիր է: Այստեղ իհարկե պետք չէ բացառել և այն, որ դեր է ունեցել Վրաստանի բավականին խրթին ներքաղաքական իրավիճակը, որ առկա է վերջին շրջանում և նոր ինտրիգ է ստացել Սաակաշվիլու գործոնի վերադարձով: Բոլոր դեպքերում, ամերիկացի բարձրաստիճան դիվանագետի ռեգիոնալ այցի և մասնավորապես հայաստանյան մասի առումով առավել կարևոր է, թե ինչ օրակարգ է լինելու հայ-ամերիկյան երկկողմ քննարկումներում, դրանում ինչ տեղ է ունենալու հայ-ադրբեջանական հակամարտությունը իր զգայուն մի շարք գործոններով, և իհարմե այն, թե ռեգիոնալ քաղաքականության առումով ինչ որոշումներ կամ հանձնարարականներ են լինելու դիվանագետներին: Ամերիկացի պաշտոնյայի այցը փաստորեն նախորդում է Մոսկվայում Ռուսաստանի գլխավորությամբ հնարավոր վեհաժողովին՝ Հայաստանի, ՌԴ և Ադրբեջանի շրջանակում: Իհարկե հազիվ թե այցը պայմանավորված լինի հենց այդ հանգամանքով, սակայն կարող է ունենալ որոշակի ազդեցություն, եթե իսկապես կա եռակողմ մոսկովյան հանդիպման ծրագիր և այն իրագործելու ջանք Ռուսաստանում: Միևնույն ժամանակ, հետաքրքիր է թերևս, թե Ռուսաստանում ի՞նչ արձագանք է ունենալու Երևանում ԱՄՆ կովկասյան դիվանագիտական կորպուսի «շտաբնային հավաք» քննարկում կազմակերպելու նախաձեռնությունը: Թե՞ այն կարող է քննարկված լինել ԱՄՆ պետքարտուղարի տեղակալ Վիկտորիա Նուլանդի հոկտեմբերի կեսին Մոսկվա կատարած եռօրյա այցի ընթացքում:
