Խորհրդարանում կառավարության հետ հարց ու պատասխանի ժամանակ անդրադարձ եղավ նոյեմբերի իննին մամուլում շրջանառվող փաստաթղթերի հնարավոր ստորագրմանը։
Հիշեցնենք, որ ըստ մամուլի հրապարակումների՝ նոյեմբերի 9-ին Մոսկվայում Հայաստանի և Բաքվի միջև երկու նոր փաստաթուղթ է ստորագրվելու, որոնցից մեկը վերաբերում է սահմանազատման ու սահմանագծմանը, մյուսը՝ ճանապարհների ապաշրջափակմանը: ԱԳ նախարար Արարատ Միրզոյանը նախ նշեց, որ Փաշինյան-Ալիև որևէ հանդիպում նախատեսված չէ և նմանատիպ բովանդակությամբ փաստաթղթերի ստորագրում նույնպես նախատեսված չէ.«Կան բազմաթիվ այլ հանդիպումների առաջարկներ, որոնց արդյունավետ, հաջող ընթացքի դեպքում կարող են լինել համատեղ հայտարարություններ կամ այլ փաստաթղթեր, որոնք պիտի արտացոլեն ՀՀ և Արցախի շահերի պաշտպանության հանձնառության առումով մեր մոտեցումները»,-ասաց Միրզոյանը։ Բացի այդ, Միրզոյանի խոսքով, բոլոր բանակցություններում բոլոր հարցերի շուրջ ցուցաբերվող մոտեցումները 100 տոկոսով համահունչ են այն մոտեցումներին, որոնք մենք բարձրաձայնում ենք և հայտնում հրապարակավ. «Այս իմաստով որևէ անակնկալ ու գաղտնիք չի կարող լինել»,-ասաց ԱԳ նախարարը։
Քրիստոնեա-ժողովրդավարական կուսակցության ղեկավար Լևոն Շիրինյանը, «Առաջին լրատվական»-ի հետ զրույցում նշեց, որ մամուլում նման լուրեր տարածողները նպատակ ունեն երկրում իրավիճակն ապակայունացնելու, և չի բացառվում, որ տեղեկատվական հոսքը կազմակերպել է հենց Մոսկվան։
«Կրեմլին ո՛չ Ռոբերտ է պետք, ո՛չ էլ հաղթանակ Փաշինյանի հանդեպ։ Կրեմլին պետք է Հայաստանը տևական անկայուն վիճակում լինի։ Եվ Կրեմլը Հայաստանը տարբեր մանիպուլյացիաներով անընդհատ լարված վիճակում է պահում՝ օգտագործելով գողապետությունը պետականության դեմ և դրանով անկայուն վիճակում պահելով երկիրը»,-ասաց Շիրինյանը։
Նրա խոսքով՝ այս համաշխարհային սոդոմ-գոմորի ժամանակաշրջանում Մոսկվային ո՛չ Սերժը, ո՛չ էլ Ռոբերտը կծառայեն, Կրեմլն անտարբեր է նրանց նկատմամբ, պարզապես Հայաստանում ներքին կայունություն չթողնելու համար Կրեմլը նրանց օգտագործում է, ինչպես նրանց օգտագործել է 30 տարի։
«Մինչ պատերազմը, ապա պատերազմից հետո Կրելմն անընդհատ է ապակայունացնում վիճակը, որ սրանց ականջից քաշի, որ այլևս չերևան։ Նրանք մնում են երկիրն ապակայունացնող ուժ»,-ասաց Շիրինյանը։
Անդրադառնալով ընդդիմության՝ նոյեմբերի 9 և 10-ի հանրահավաքներին՝ Շիրինյանը նշեց, որ այս փաստաթղթերի ստորագրումը չի լինում, հետաքրքիր է, թե ինչի և ում համար են անում հանրահավաք։
Հայ ժողովուրդը, նրա խոսքով, չի բերել իշխանության այնպիսի մարդկանց, որոնք հայրենիքն աճուրդի կհանեն։
«Կան ձախողված պետություններ որոնց լիկվիդացիայի հարցը դառնում է ժամանակի հարց, և հիմա Մոսկվան ուզում է Հայաստանի վրա ձախողված պետության պիտակ փակցնել իր նախկին ստրուկների միջոցով, որոնք ապակայունացնում են պետությունը։ Հերիք է ասեն, որ Նիկոլը եկել է հայրենիքը հանձնի, էդ նույն Նիկոլը չէ՞ր, որ ասում էր՝ Արցախը Հայաստան է և վերջ, երկու-երեք նախագահները պատերազմի հենց սկզբից ինչ գիտեին, որ պատերազմ է և ինչու էին գտնվում Արցախում, այս հարցին թող պատասխանեն»,-հավելեց Շիրինյանը՝ կոչ անելով նախ գողացածը հետ բերել. «Թող արժանապատվություն ունենան, իրենք Պուտինի ձեռքին խաղալիք են։ Պուտինը դրանց օգտագործում է Հայաստան պետության դեմ՝ երկրում իրավիճակն ապակայունացնելու համար։ Ոչ միայն իրենց ժողովրդին են կողոպտում, այլ օտարի ձեռքին խաղալիք են»։
