Հոկտեմբերի 27-ի ահաբեկչական խմբի ղեկավար Նաիրի Հունանյանը, որը հոգեմետ դեղեր է օգտագործում դեռևս 2010թ.-ից, հարցաքննվել է «Հոկտեմբերի 27»-ի քրեական գործի՝ վերաբացված մասի շրջանակներում։ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը «Փաստինֆո»-ի հետ զրույցում տեղեկացրել է, որ քրեական գործով հարցաքննվել է ընդհանուր առմամբ մոտ 10 անձ, այդ թվում՝ Նաիրի Հունանյանը, Կարեն Հունանյանը և մյուս դատապարտյալները։
Քրեական գործի շրջանակներում հարցաքննվել է նաև հոկտեմբերի 27-ին տեղի ունեցած ոճրագործության հետևանքով զոհված Յուրի Բախշյանի այրին՝ Անահիտ Բախշյանը, որի դիմումի հիման վրա էլ քրեական գործը երկու տարի առաջ վերաբացվել է։
«Հոկտեմբերի 27»-ի քրեական գործի անջատված մասով, որով վերաբացվելուց հետո նախաքննություն է իրականացվում ԱԱԾ-ում՝ ենթադրյալ կազմակերպիչներին բացահայտելու ուղղությամբ։ Գոռ Աբրահամյանը տեղեկացրել է նաև, որ ՀՀ գլխավոր դատախազության կողմից ԱԱԾ տնօրենին հանձնարարություն էր տրվել՝ օպերատիվ-հետախուզական միջոցառումներ իրականացնելու, որոնցով գործընթացները շարունակվում են։ Բացի այդ՝ բազմաթիվ առգրավումներ են կատարվել, այդ թվում՝ քննության համար հետաքրքրություն ներկայացնող անձանց անձնական գործեր, կոնկրետ հանցագործության վերաբերյալ քրեական գործերի նյութեր, նաև ձայնագրություններ, վերջիններս ուղարկվել են փորձաքննության, որոնք ընթացքի մեջ են․«Մշակված և առաջ են քաշված մի քանի վարկածներ, մշակված է քննչական պլան, ըստ որի էլ քննությունը շարունակվում է»,- նշել է Աբրահամյանը:
ՀԺԿ քարտուղար Գրիգոր Հարությունյանն «Առաջին լրատվական»-ի հետ զրույցում նշեց, որ ինքը շատ մեծ ցանկություն ունի, որպեսզի գործը բացահայտվի․«Բայց ոչինչ չբացառենք։ Ես անձամբ չեմ բացառում, որ այդ սրիկան կարող է արդեն խոսել։ Ամեն դեպքում երևի ինչ-որ հույսեր է ունեցել այս ամբողջ տարիների ընթացքում, որ 20 տարին կանցնի դուրս կգա, բայց տեսնում է, որ ինքն այնտեղից ոտքերն առաջ է դուրս գալու ու կարող է խոսել։ Չեմ ասում, թե ցանկանում է, բայց ամեն դեպքում չեմ էլ բացառում»։
Հարությունյանն ընդգծեց, որ որոշակի հույսեր են առաջացել, քանի որ, դատախազի օգնականի խոսքերից հստակ դարձավ, որ մարդիկ այս ընթացքում ինչ-որ աշխատանք այնուամենայնիվ իրականացրել են․«Իհարկե շատ բարդ ու դժվար է, իրենց ամբողջությամբ հասկանում եմ։ Կցանկանայի, որ ավելի առաջ գնային։ Հենց այն փաստերը, թե կարևորագույն վկաները ոնց են վերացվել․․ բայց գլխավոր մարդասպանները կան ու կարծում եմ կարելի է գնալ բացահայտման»։
Հարցին, թե պատերազմից հետո թուլացած Հայաստանը ինչքանով կարող է գնալ նման մասշտաբային գործի բացահայտման, մեր զրուցակիցն ասաց․«Չեմ կարծում, թե Հայաստանի թուլացած կամ ուժեղ վիճակը կապ ունի դրա հետ։ Ես անձամբ բազմիցս ասել եմ, որ մեր երկիրը թուլացել է, որովհետև Հոկտեմբերի 27 է եղել։ Եթե դա չլիներ, մենք այսպիսի թուլացած վիճակում չէինք լինի, այսպիսի կործանված տնտեսություն, ավիրված բանակ չէինք ունենա։ Այդ ամենը կապ ունի հոկտեմբերի 27- հետ ու մենք այդ մասին բազմիցս ասել ենք։ Հոկտեմբերի 27-ը ճակատագրական օր է եղել հայ ազգի համար»։
Խոսելով Մեղրիի տարբերակի և այսօր էլ ընթացող միջանցքի հետ կապված խոսակցությունների մասին, Գրիգոր Հարությունյանն ասաց․«Հոկտեմբերի 27-ից առաջ ինտենսիվ քննարկումներ են եղել անգամ փոխանակման, հետո Արաքսի ափով 1․5 կմ լայնությամբ հատված տալը, հետո էստակադայի տարբերակով անվերահսկելի ճանապարհ ադրբեջանցիների համար։ Այն ժամանակ հասարակության ու առաջին հերթին Կարեն Դեմիրճյանի ու Վազգեն Սարգսյանի ճնշման տակ, նրանց քաղաքական ուժերի ճնշման տակ այդ գործարքն ի չիք դարձավ։ Անգամ Հոկտեմբերի 27-ից հետո,2001 թվականին ես և Վիկտոր Դալլաքյանը կազմակերպեցինք պետաիրավական հանձնաժողովում քննարկում, Օսկանյանին հրավիրեցինք, ինքն էլ սկսեց այդ ամենը երգել։ Բոլոր լրագրողներն այդ մասին տեղյակ են։ Քոչարյանն ասում էր՝ իբրև թե այդպիսի խոսակցություն չի եղել, բայց կենդանի մարդն այդ մասին ասել է, հիմա էլ հարցնեն՝ էլի կասի»։
