Հայաստանի հանրության ուշադրությունից դուրս է մնացել Հելսինկիում ՌԴ և ԱՄՆ զինված ուժերի գլխավոր շտաբերի պետերի հանդիպում, որը տևել է ավելի քան վեց ժամ: Հանդիպման մանրամասներ չեն բարձրաձայնվում, իսկ տեղեկատվական արտահոսքերի մակարդակում տարբեր լրատվամիջոցներ նշում են, որ հանդիպմանը քննարկվել է աֆղանական թեման և դրա շրջանակում կենտրոնասիական ռեգիոնում ամերիկյան բազաների տեղակայման հնարավորությունը: Ընդ որում, այդ տեղեկատվության ֆոնին թերևս ուշադրության է արժանի այն, որ այս օրերին Ուզբեկստանը հայտարարեց, որ չունի ՀԱՊԿ անդամ դառնալու հետաքրքրություն:
Այս հայտարարությունն ինքը հետաքրքիր էր նրանով, որ վերջին երեք-չորս տարիներին պաշտոնական Տաշքենդը խոսում էր բոլորովին հակառակ տրամադրության մասին, արտահայտելով ՀԱՊԿ անդամությունը վերականգնելու տրամադրություն: ՀԱՊԿ անդամ երկրները շաբաթներ առաջ հայտարարեցին, որ չեն դիտարկում իրենց տարածքում ամերիկյան ռազմական ենթակառուցվածքների տեղակայման հեռանկար: Խոսքը հասկանալիորեն վերաբերում է հենց ՀԱՊԿ միջինասիական անդամներին՝ Ղազախստան, Կիրգիզիա, Տաջիկստան: Ահա այդ ֆոնին է ուշագրավ, որ Ուզբեկստանը հայտարարեց ՀԱՊԿ-ով հետաքրքրված չլինելու մասին: Սա հարց է առաջացնում, թե արդյո՞ք Տաշքենդը այդպիսով չի ներկայացնում ամերիկյան ռազմական ենթակառուցվածքների տեղակայման պատրաստակամության հայտ: Միևնույն ժամանակ, նույն շրջանակում հնարավոր է դիտարկել նաև հարցադրումը, թե արդյո՞ք դա չի կարող լինել ամերիկա-ռուսական որևէ փոխզիջումային մոտեցման դրսևորում, երբ միջինասիական ռեգիոնում մի կողմից «անձեռնմխելի» կլինի ՀԱՊԿ պատասխանատվության գոտին, մյուս կողմից «ազատ գոտում» կտեղակայվեն նաև ամերիկյան ենթակառուցվածքներ:
Համենայնդեպս, ՌԴ և ԱՄՆ զինված ուժերի գլխավոր շտաբերի պետերի ավելի քան վեց ժամ տևած հանդիպումը, այն էլ Ֆինլանդիայում ոչ միայն աշխարհագրորեն, այլ կառավարական ենթակայության տակ գտնվող տարածքում, վկայում է իսկապես լրջագույն և խորքային քննարկումների մասին: Իսկ այդ առումով իհարկե կարևոր է, թե այդ քննարկումները որքանով կարող էին ներառել Կովկասը, քանի որ ներկայիս անվտանգային վերափոխումների գործընթացը պետք է դիտարկել շղթայական տրամաբանության մեջ և թերևս հենց Ֆինլանդիայից մինչև Աֆղանստան: Կովկասի առումով թերևս ավելորդ չի լինի հիշատակել և այն, որ նախորդ տարիներին ԱՄՆ ու ՌԴ զինված ուժերի գլխավոր շտաբերի պետերի, կամ ՌԴ զինված ուժերի գլխավոր շտաբի պետի ու Եվրոպայում ամերիկյան զորքերի հրամանատարության ղեկավարի հանդիպումների վայր էր Բաքուն:
