Չնայած, որ վերջին 5 հանդիպումներում ֆուտբոլի Հայաստանի ազգային հավաքականը աշխարհի առաջնության ընտրական փուլում հաղթանակ չի տարել, այնուամենայնիվ, մեր գլխավոր թիմը պահպանել է դիրքը հոկտեմբերի 21-ին հրապարակված ՖԻՖԱ-ի դասակարգման աղյուսակում։ Հայաստանը շարունակում է մնալ 89-րդ հորիզոնականում և ամենայն հավանականությամբ 2021 թվականը կավարտի լավագույն հարյուրյակում։ Հիշեցնենք, որ այս տարի մերոնք դեռևս երկու հանդիպում պետք է անցկացնեն աշխարհի առաջնության ընտրական փուլում։ Նոյեմբերի 11-ին Երևանում մեր ազգային թիմը կմրցի Հյուսիսային Մակեդոնիայի հետ, իսկ երեք օր անց կհյուրընկալի աշխարհի քառակի չեմպիոն Գերմանիային։ Այս տարվա ընթացքում Հայաստանի հավաքականի ամենաբարձր դիրքը եղել է 88-րդ հորիզոնականը։ Սեպտեմբերի սկզբին, սակայն մեր հավաքականը ընտրական փուլի երեք հանդիպում անցկացրեց՝ սկիզբ դնելով հարաբերական անհաջողությունների շարքին։
Սեպտեմբերի 2-ին մերոնք Սկոպիեյում ոչ-ոքի 0։0 խաղացին Հյուսիսային Մակեդոնիայի հետ, իսկ երեք օր անց հյուրընկալվելիս 6։0 հաշվով զիջեցին Գերմանիային։Սեպտեմբերին 8-ին էլ մեր հավաքականը Վազգեն Սարգսյանի անվան «Հանրապետական» մարզադաշտում 1։1 խաղաց Լիխտենշտեյնի հետ։ Այս երեք հանդիպումներում գրանցված արդյունքները պատճառ հանդիսացան, որ Հայաստանի հավաքականը կորցնի այս տարվա լավագույն դիրքը։ Սեպտեմբերին նահանջեցինք մեկ հորիզոնականով։ Հոկտեմբերին Հայաստանի հավաքականը հյուրընկալվելիս 1։1 խաղաց Իսլանդիայի հետ, այնուհետև 1։0 հաշվով զիջեց Ռումինիային։ Երևի թե Իսլանդիայի հետ դրական արդյունքը թույլ տվեց պահպանել 89-րդ հորիզոնականը։ Ինչէ ընտրական փուլում մեր մրցակիցներից Հյուսիսային Մակեդոնիայի հավաքականն իր հերթաին նախորդ ամսվա համեմատ պահպանել է դիրքը և շարունակում է մնալ 74-րդ հորիզոնականում։ Գերմանիայի ազգային հավաքականը նախորդ հրապարակման համեմատ առաջադիմել է ևս երկու տեղով և հիմա 12-րդ հորիզոնականում է։ Լիխտենշտեյի ազգային թիմը նախորդ ամսվա համեմատ նահանջել է երկու կետով հանգրվանելով 190-րդ հորիզոնականում։ Նախորդ ամսվա համեմատ իսլանդացիները նահանջել են 2 հորիզոնականով և հիմա 62-րդն են։ Իսկ ահա Ռումինիաի հավաքականն առաջադիմել է մեկ կետով տեղ զբաղեցնելով 41-րդ հորիզոնականում։Ինչև, ԱՊՀ երկրների կտրվածքով Հայաստանի հավաքականը շարունակում է եզրափակել լավագույն եռյակը։ Մերոնք զիջում են միայն Ռուսաստանին և Ուկրաինային։
Վերջինս 27-րդն է, իսկ ռուսները՝ 33-րդը։ Վրաստանի հավաքականը նախորդ ամսվա համեմատ առաջադիմել է 3 տեղով և հիմա 93-րդն է։ Տարածաշրջանի կտրվածքով ևս Հայաստանի հավաքականը երրորդն է։ Մեր գլխավոր թիմը զիջում է Թուրքիային և Իրանին։ Վերջինս 22-րդ տեղում է, իսկ թուրքերը՝ 39-րդ։ Նախորդ ամսվա համեմատ Թուրքիան առաջադիմել է երկու հորիզոնականով, իսկ Իրանը պահպանել է դիրքը դասակարգման աղյուսակում։ Ադրբեջանի հավաքականը շարունակում է անկում ապրել վարկանիշային աղյուսակում և այս պահին 117-րդն է։ Նախորդ ամսվա համեմատ ադրբեջանցիները նահանջել են 2 հորիզոնականով։ Ինչևէ ՖԻՖԱ-ի դասակարգման աղյուսակը շարունակում է գլխավորել Բելգիայի ազգային հավաքականը։ Բրազիլիայի հավաքականը երկրորդն է, իսկ լավագույն եռյակը եզրափակում է աշխարհի գործող չեմպիոն Ֆրանսիայի ազգային հավաքականը։ Վերջինս այս ամիս հաղթող դարձավ Ազգերի լիգայի խաղարկությունում, ինչի չնորհիվ վերադարձավ լավագույն եռյակ։ Եվրոպայի գործող չեմպիոն Իտալիայի ազգային թիմը միայն չորրորդ հորիզոնականում է։ Եվրոպայի փոխչեմպիոն անգլիացիներն էլ եզրափակում են լավագույն հնգյակը։ 6-րդ տեղում Արգենտինան է, որին հաջորդում են , Իսպանիան, հետո Պորտուգալիան, Մեքսիկան և Դանիան։ Վերջինս աշխարհի առաջնության ընտրական փուլում ֆանտաստիկ արդյունք է գրանցել։
8 խաղում տոնելով նույնքան հաղթանակ այս հավաքականը վստահորեն գլխավորում է մրցաշարային աղյուսակը և ժամանակից շուտ նվաճել է 2022 թվականի աշխարհի առաջնության եզրափակիչ փուլի ուղեգիր։ Դանիան նաև միակ հավաքականն է, որ ընտրական մրցաշարում ոչ մի գնդակ բաց չի թողել։ Այս պահին Դանիայի հավաքականի խփած և բաց թողած գնդակների հարաբերակցությունը 27։0 է։
