«Հանուն Հանրապետության» կուսակցության նախագահ Արման Բաբաջանյանը անդրադառնալով երեկ ՌԴ նախագահ Պուտինի՝ Վալդայ փորձագիտական ակումբում արված հայտարարությանը, կարծում է, որ ՌԴ նախագահը կողմերին ասում է, որ հեռակառավարման վահանակը իր ձեռքում է:
«Ռուսաստանը հանդես չի գալիս որպես անաչառ մոդերատոր և այդպես չէ պատերազմից սկսած: Պարտությունից հետո մեզ ակնարկել հավելյալ զիջումների մասին՝ ՀՀ ռազմաքաղաքական ղեկավարությանը լուրջ մտածելու առիթ պետք է տա: Ռուսաստանը չի կարող Հայաստանի շահերը դիտարկող դիրք զբաղեցնել: Չպետք է ձեռքերը ծալած սպասել, թե Հայաստանի շահերի հաշվին ինչպես են զարգանում գործընթացները»:
Անդրադառնալով ԱԽ քարտուղար Արմեն Գրիգորյանի այն պնդմանը, որ միջանցքի հարց չի քննարկվել և չի քննարկվում, Բաբաջանյանը կարծում է, որ ԱԽ քարտուղարը պետք է պատասխանի՝ ինչու եռակողմը հանդիպումը տեղի ունեցավ, երբ ադրբեջանական զորքերը գտնվում են մեր սուվերեն տարածքում․« Հայաստանը միջանցքի հարցով ժամ առաջ պետք է հստակություն մտցնի: Պետք է հասնել համոզման, որ «միջանցքի» հարցում Երևանի և Մոսկվայի ժամացույցները նույն ուղղությամբ ու արագությամբ են շարժվում»:
Բացի այդ, Բաբաջանյանը հիշեցնում է, որ «միջանցքի» հարցը արցախյան առաջին պատերազմի հաղթանակից հետո օրակարգ է մտցրել երկրորդ նախագահ Քոչարյանը․ «Այս «միջանցքի» հարցը պատահական չէ հայտնվում օրակարգում: Հասարակությունը պետք է բացատրություն պահանջի Քոչարյան-Օսկանյան զույգից»:
