«ՊՆ-ի կողմից ՄԻՊ-ի զեկույցի հերքումը պետական դավաճանության տրամաբանության մեջ է»․ կարծիք է հայտնում Իրազեկ քաղաքացիների միավորում ՀԿ ծրագրերի ղեկավար, «Անկախ դիտորդ» նախաձեռնության ներկայացուցիչ Դանիել Իոաննիսյանը։ Ըստ նրա՝ ՊՆ-ի հույսը ձմեռն էր, որ ադրբեջանական զորքերը չեն կարողանա ապահովել թիկունքի մատակարարումը ու կհեռանան, ՄԻՊ-ը ապացուցեց հակառակը, որ նրանք չեն պատրաստվում հեռանալ, այլ ամրանում են։ Դրան հաջորդեց ՊՆ-ի հերքումը։
Օրերս պաշտպանական գերատեսչությունը հերքել էր մարդու իրավունքների պաշտպանի հայտարարությունն այն մասին, որ Գեղարքունիքի մարզ ապօրինի ներխուժած ադրբեջանական զինված ուժերը հայկական գյուղերի անմիջական հարևանությամբ իրականացնում են ամրացման, այդ թվում՝ ճանապարհների կառուցման աշխատանքներ, կուտակել են մեծ քանակությամբ վառելափայտ և այլն: Օմբուդսմենը արձանագրում է՝ ՊՆ-ի հերքումն հօգուտ իրենց օգտագործելով՝ ադրբեջանական տեղական ու արտասահմանյան աղբյուրներով հայտարարություններ են արվել այն մասին, որ ՀՀ ՊՆ-ն է պաշտոնապես հավաստում, որ սահմանային բնակիչների իրավունքներին վերաբերող մարդու իրավունքների պաշտպանի զեկույցները կամ պնդումները կեղծ են և, դիմելով տարբեր ատյանների, պահանջել են Պաշտպանի զեկույցներն ու հայտարարություններն այլևս հիմք չընդունել: Արման Թաթոյանը ևս մեկ անգամ ապացույցներ է հրապարակել։