Ադրբեջանը ազատ է արձակել իրանցի վարորդներին, որոնց ձերբակալել էր Գորիս-Կապան ճանապարհահատվածում: Հատկանշական է, որ Բաքվի այս որոշմանը նախորդել էր Իրանի հայտարարությունը: Խոսքը Իրանի միջազգային փոխադրումների և տարանցիկ ճանապարհների վարչության գլխավոր տնօրենի նամակի մասին է՝ ուղղված բեռնափոխադրողներին, որում նշվում է, որ իրանցի վարորդներին արգելվում է Հայաստանի տարածքով մուտք գործել «Ադրբեջանի հանրապետության Լեռնային Ղարաբաղի և Լաչինի տարածաշրջան»: Այսպիսով, Ադրբեջանը ուզում էր, որպեսզի Իրանը ճանաչի այդ հատվածը Ադրբեջանի տարածք ու բեռնատարները չգնան Արցախ, և ըստ էության այդ պահանջը բավարարվեց: Ինչի մասին է վկայում Թեհրանի հայտարարությունն ու Բաքվի հաջորդական քայլը: Այս և տարածաշրջանային կարևորության մի շարք հարցեր «Առաջին Լրատվական»-ը քննարկել է իրանագետ Գարիկ Միսակյանի հետ:
«Նախ պետք է նշել, որ հենց իրանական տիրույթում այդ նամակը ոչ միանշանակ գնահատվեց: Կային մի քանի արձագանքներ: Եղան հայտարարություններ, որ Իրանը որոշակի զիջումների է գնացել՝ վարորդներին ազատ արձակելու դիմաց: Հետո նաև եղավ փորձագիտական շրջանակների կողմից պարզաբանում. նախ նշվեց, որ երբևէ պաշտոնապես բեռնափոխադրումներ չեն իրականացվել Արցախի Հանրապետություն, իսկ ներկայում որևէ մեկը չի կարող խանգարել, հատկապես եթե Տաթևի հատվածի ճանապարհի շինարարությունը ավարտվի, իրանական ապրանքերի մուտքը Արցախ, որը կարելի է իրականացնել նաև հայ բեռնափոխադրողների միջոցով… Իրականում ստեղծված իրավիճակի առումով սա խոշոր փոփոխություն չէ: Իրանը աշտոնապես բավարարելով Բաքվի պահանջը՝ հնարավորություն է ստանում հետագայում այլ հարթությամբ քարոզչություն վարել»,-ասաց Միսակյանը: Մեր զրուցակիցը միևնույն ժամանակ ընդգծեց, որ Իրանը բավականին երկար սպասեց հայկական կողմի արձագանքին, թեպետ ոչ պաշտոնական մակարդակում, բայց Իրանում ձևավորվել է կարծիք, որ եթե հայկական կողմ չի ցանկանում կամ չի կարողանում վերահսկողություն հաստատել Գորիս-Կապան ճանապարհահատվածի վրա, ապա իրանական կողմը չպետք է միջամտի:
Առավել մանրամասն՝ տեսանյութում: