«Հեռուստամարաթոն 2010»-ի արդյունքում հավաքագրվել է 20, 862,733 ԱՄՆ դոլարի նվիրատվություն ու նվիրատվության խոստում: Աշխարհի բոլոր անկյուններից հազարավոր հեռուստադիտողներ հետևեցին դրամահավաք մարաթոնին` կաբելային, արբանյակային և առցանց հեռարձակմամբ` կատարելով իրենց նվիրատվությունները:
Մարաթոնի ընթացքում ներկայացվեցին համերգային կատարումներ, հնչեցին կոչեր քաղաքական գործիչների, սպորտի և արվեստի ներկայացուցիչների ու հայազգի հեղինակավոր անձանց կողմից: Հանդես եկան Հիմնադրամի բարերարներ և տեղական մարմինների ատենապետեր: Հեռուստամարաթոնն ի մի բերեց տարվա ընթացքում Հայաստանում, Արցախում և Սփյուռքում դրամահավաք միջոցառումների, այդ թվում` հեռախոսամարաթոնների, ռադիոթոնների, բարեգործական համերգների, ճաշկերույթների, ցուցահանդեսների, ինչպես նաև Մոսկվայում կայացած գալա երեկոյի ու Ֆրանսիայում տեղի ունեցած համաեվրոպական հեռախոսամարաթոնի արդյունքում հավաքագրված գումարները: Հեռուստամարաթոնի ընթացքում նվիրատուներին հաշվետվություն ներկայացվեց արդեն իսկ կատարված աշխատանքների մասին, ու հայությունը ևս մեկ անգամ համախմբվեց հայրենիքի համար կարևոր մեկ այլ` նոր ձեռնարկի շուրջ: Ընթացիկ տարվա հանգանակությունները կուղղվեն Արցախում խմելու և ոռոգման ջրի խնդրի լուծմանը, ինչպես նաև Հայաստանի և Արցախի սահմանամերձ գյուղերում շարունակվող համապարփակ զարգացման ծրագրին` շոշափելի ու երկարաժամկետ փոփոխություն բերելով շահառուների կյանքում:
Հիշեցնենք, որ Հիմնադրամը շարունակում է նվիրատվություններ ընդունել: Հայաստանում նվիրատուները մինչև տարեվերջ կարող են կանխիկ նվիրատվություններ կատարել ցանկացած փոստային բաժանմունքում: Մինչև նոյեմբերի 30-ը բջջային կապի բոլոր բաժանորդների համար շարունակում է գործել 8000 կարճ համարը, որին ուղարկելով իր անուն ազգանունը նվիրատուն կատարվում է 500 դրամի չափով փոխանցում: Այս պահի դրությամբ ստացվել է շուրջ 20 հազար կարճ հաղորդագրություն, և ավելի քան 10 հազար նվիրատու նախընտրել են մասնակցել փոստային դրամահավաքին: Ընդունվում են նաև առցանց նվիրատվություններ himnadram.org կայքում:
Հիմնադրամի գործադիր վարչությունն առաջիկայում` մինչև դեկտեմբերի 15-ը, կհրավիրի մամուլի ասուլիս, որի ընթացքում գործադիր տնօերն Արա Վարդանյանը կհրապարակի մանրամասներ նվիրատվությունների ու նվիրատուների մասին և կպատասխանի լրագրողներին հետաքրքրող հարցերին:
«Հայաստան» համահայկական հիմնադրամն իր խորհին շնորհակալությունն է հայտնում աշխարհասփյուռ բոլոր նվիրատուներին` հայրենիքը շենացնելու մեր առաքելությանը տարեցտարի ավելի ակտիվ աջակցություն ցուցաբերելու համար:
“Հայաստան» համահայկական հիմնադրամ