«ԱԱԾ պահեստազորի սպաների միություն» հասարակական կազմակերպությունը հայտնում է, որ ՀՀ երկրորդ նախագահ Ռոբերտ Քոչարյանի հանդիպում է ունեցել «ԱԱԾ պահեստազորի սպաների միություն» հասարակական կազմակերպության համահիմնադիրներ Հրանտ Եպիսկոպոսյանի, Վրեժ Արզումանյանի, Միքայել Համբարձումյանի հետ։
Պաշտոնական հաղորդագրության մեջ նշվում է, որ քննարկվել են երկրի անվտանգային խնդիրները, տարածաշրջանային հնարավոր մարտահրավերներին առնչվող հարցերը, անդրադարձ է կատարվել երկրի ներսում ձևավորված բարոյահոգեբանական մթնոլորտին:
ԳԽ պատգամավոր Ազատ Արշակյանի կարծիքով՝ երբ ուժային կառույցները որևէ երկրում՝ անկախ նրանից նախկին են, գործող, թե ապագա, հանդիպում են այլընտրանքային իշխանության հետ, համագործակցում են նրանց հետ՝ դեմ են գնում իրենց երդմանը , «պրիսյագային», դեմ են գնում, խախտում են այդ երդումը․ «Այլընտրանքային իշխանություն որևէ երկրում չպետք է լինի, պետք է լինի մեկ իշխանություն, և ուժայինները՝ անկախ նրանից նախկին են, ներկա, թե ապագա՝ պետք է ենթարկվեն այդ մի իշխանությանը»,-«Առաջին լրատվական»-ի հետ զրույցում ասաց նա։
Ըստ Արշակյանի՝ քանի դեռ Հայաստանում կա ԱԱԾ, երբ չի գրվում Հայաստանի Հանրապետության Ազգային Անվտանգության ծառայություն, ուրեմն անցյալի, ներկայի ու ապագայի այդ ծառայությունները կենթարկվեն նրանց, ով իրենց կպատվիրի․ «Պետք է անպայման գրվի ՀՀ ԱԱԾ, նաև՝ այդպես բարեհունչ է։ Ես իշխանություններին կոչ եմ անում խիստ միջոցներ ձեռնարկել նախկինների նկատմամբ, օրենքը դա թույլ է տալիս։ Նաև պետք է անվանափոխություն անել՝ ՀՀ ԱԱԾ, որ իմանան, որ ծառայում են Հայաստանին և ոչ թե որևէ անձին ու որևէ այլընտրանքային ուժի»։
Քաղաքագետ Լևոն Շիրինյանի կարծիքով՝ նման հանդիպումները վտանգավոր են, երկրորդ՝ անթույլատրելի և երրորդ՝ վկայում են գործող իշխանության թուլության մասին․ «Դա անպատասխանատու վերաբերմունք է երկրի անվտանգության հարցերին։ Նման հանդիպումներով նպատակ են հետապնդում երկրում առաջացնել երկիշխանություն, լենինյան տակտիկան է»,-«Առաջին լրատվական»-ի հետ զրույցում ասաց նա։
Շարունակելով Շիրինյանն ընդգծեց․ «ԱԱԾ ծառայողներն ո՞վ են, մարդիկ, որ պետք է մինչև մահ ու գերեզման լուռ լինեն, բայց դա այն կառույցն է, որ են Վանեցյանին իշխանության բերեց։ Մինչդեռ այս պայմաններում իշխանության կողմից անպատասխանատու վերաբերմուքն ցուցաբերվեց։ Ազգային անվտանգության աշխատակիցը մինչև գերեզման էլ լուռ է լինում։ Դեռ պետք է պարզենք՝ դրանք պորտալարը կտրե՞լ են իրենց մայր հայրենիքից՝ Ռուսաստանից։ Պետք է զրկել նրանց թոշակներից, թող Ռուսաստանից թոշակ ստանան»։
