«Առաջին լրատվական»-ի հարցերին պատասխանել է Իրանի խորհրդարանի հայ պատգամավոր Արա Շահվերդյանը
Ադրբեջանի նախագահ Իլհամ Ալիևը Հայաստանին և Իրանին մեղադրել է դեպի Եվրոպա թմրաշրջանառություն կազմակերպելու մեջ: Ինչպե՞ս եք գնահատում նման հայտարարությունը, ի՞նչ նպատակ է այն հետապնդում:
Ադրբեջանի նախագահի արտահայտությունները Հայաստանի և Իրանի վերաբերյալ կեղծ են և երկու երկրների նման հարցով համագործակցությունը բացառվում է։
Մինչդեռ, Իրանը և Հայաստանը մշտապես համագործակցություններ են ծավալել թմրանյութերի դեմ պայքարի ապօրինի շրջանառությունը կանխարգելման ուղղությամբ։ Այդ մեղադրանքը կեղծիք է, ընդհանրապես Ադրբեջանի նախագահը փորձում է խուսափել պատասխանատվությունից՝ այդ երկրի կողմից Գորիս- Կապան ճանապարհին իրանական բեռնատարների համար խոչընդոտներ առաջացնելու և իրանցի վարորդների ձերբակալման հարցին լուծում չտալու վերաբերյալ։
Ադրբեջանը շարունակում է վարել իր ծավալապաշտական քաղաքականությունը և, դրա վկայությունը թուրքական և իսրայելական ուժերի համագործակցությամբ դեպի Նախիջևան նկրտումներն են։
Նախօրեին ՀՀ նախագահի հրամանագրով հետ է կանչվել Իրանում Հայաստանի դեսպան Արտաշես Թումանյանը: Ձեր կարծիքով ինչո՞ւ: Որքանո՞վ էր դա պայմանավորված նրանով, որ Թումանյանը սերտ առնչություններ ունի ՀՅԴ-ի հետ: Ինչ ակնկալիքներ ունեք նոր դեսպանից։
Ընդհանրապես բոլոր դեսպանները երեք տարով են իրականացնում տվյալ երկրում դիվանագիտական առաքելությունները, մինչդեռ պարոն Թումանյանը Իրանում ՀՀ դեսպան էր նշանակվել արդեն 6 տարի։ Պարոն Թումանյանը գնահատելի առաքելություն իրականացրեց Իրանում որպես դեսպանի իր պաշտոնում։ Այս տարիների ընթացքում շարունակվեց զարգանալ Իրան- Հայաստան բազմակողմանի հարաբերությունները, հակառակ կորոնավիրուսային համավարակի բերումով ստեղծված իրավիճակի, տնտեսական հարաբերությունները նույնպես շարունակ զարգացում արձանագրեցին։ Ապրանքաշրջանառության աճ նույնպես գրանցվեց։ Պարոն Թումանյանը ունի դիվանագիտական առաքելություն իրականացնելու մեծ փորձ, ապագայում նա կարող է ստանձնել այլ դիվանագիտական առաքելություններ։ Ինչ վերաբերում է ԻԻՀ-ում ՀՀ նոր դեսպանին, ապա ակնկալիքներն այն են, որ պարոն Արսեն Առաքելյանը նույնպես կշարունակի ջանքեր գործադրել Իրան- Հայաստան հարաբերությունների առաջընթացի ուղղությամբ։ Համոզված եմ, որ այդպես կլինի։ Նոր և դրական զարգացումների ակնկալիքներ ունենք՝ հանուն հայ-իրանական հարաբերությունների մերձեցման:
Իրան-Հայաստան հարաբերությունների ներկա փուլն ինչպե՞ս եք գնահատում։
Իրանի և Հայաստանի դրացիական և բարեկամական հարաբերությունները ունեն պատմական անցյալ և մեծ ներուժ։ Իրան- Հայաստան հարաբերությունները բարձր մակարդակի վրա են գտնվում և ես բարձր եմ գնահատում հայ-իրանական համագործակցությունը, որը հիմնված է դարավոր բարեկամության և փոխադարձ հարգանքի վրա: Վերջին տարին հակառակ կորոնավիրուսի համավարակով ստեղծված իրավիճակի, երկու երկրների միջև տնտեսական համագործակցության և առևտրաշրջանառության ծավալները շարունակել են աճ արձանագրել։ Բնականաբար, իրացված չէ ամբողջ ներուժը և առկա են հսկայական հնարավորություններ, առհասարակ հայ-իրանական առևտրատնտեսական և ամենատարբեր ոլորտի հարաբերություններն ավելի մեծ ներուժ ունեն, և դրանք պետք է առավելագույն արդյունավետությամբ օգտագործել:
