«Առաջին լրատվական»-ի զրուցակիցն է ԱԺ ՔՊ խմբակցության պատգամավոր, Պաշտպանության և անվտանգության հարցերի մշտական հանձնաժողովի անդամ Գագիկ Մելքոնյանը
-Պարոն Մելքոնյան, 44-օրյա պատերազմի հանգամանքները ուսումնասիրող հանձնաժողով կձևավորվի։ Ի՞նչ եք կարծում, արդյոք այս հանձնաժողովը կարողանալո՞ւ է բացահայտել 44-օրյա պատերազմի հանգամանքները։ Դուք մասնակցել եք 44-օրյա պատերազմին, ո՞րն է լինելու Ձեր անելիքն այս հանձնաժողովում։
-Մեր անելիքն այն է լինելու, որ ժողովրդից ոչինչ չի թաքցվելու, ոչ մի բան գաղտնի չի մնալու։ Այդ հանձնաժողովը կազմված է լինելու խորհրդարանական ընդդիմությունից, արտախորհրդարանական ուժերից։ Եվ հիմնական նպատակն այն է, որ մեր ժողովրդից ոչինչ չթաքցվի, ժողովուրդն իմանա իրականությունը՝ ինչպես են եղել զարգացումները մինչև պատերազմը, ապա պատերազմի ժամանակ և պատերազմից հետո։
-Մեզ հետ զրույցում մեկ անգամ չէ, որ նշել եք՝ գեներալներ են եղել, որ զինվորներին ասել են`հողերը ծախված են։ Պատերազմից մեկ տարի անց նրանցից ոչ մեկ ձերբակալված չէ, ինչո՞ւ։
-Որքան գիտեմ, կան հարուցված 500-ից ավելի քրեական գործեր։ Եվ այս գործերը քննվում են։ Եվ հիմա, երբ ստեղծվում է քննիչ հանձնաժողով, արդեն ամեն ինչ միանգամից դուրս կգա ջրի երես, թե ինչ է տեղի ունեցել այնտեղ։ Խոսակցություններ են պտտվում, որ գեներալները զինվորներին ասել են՝ թողեք գնացեք, հողերը ծախված են, սպաներին նման հրահանգ են տվել։ Հիմա պետք է պարզել՝ տվե՞լ են այդ գեներալները նման հրամաններ, թե ոչ։ Քննիչ հանձնաժողովի հիմնական դերն էլ լինելու է ամեն ինչ պարզաբանելը։
-Քննիչ հանձնաժողովը, սակայն, իրավապահ համակարգի մաս չի կազմում, և անդամ այդ բացահայտումների դեպքում չի կարող որևէ մեկին պատասխանատվության կանչել։
-Բոլորն իրար հետ են աշխատելու, դատախազությունն էլ պետք է հետևի, և եթե որևէ մեկի շուրջ ծավալվել քննարկումները, դատախազությունը պետք է խառնվի և նրա տիրույթում պետք է ծավալվեն այդ գործողությունները։ Մնացածը պետք է քննությունը պարզի, ապացուցի այդ մարդկանց մեղքը։
-Արդյոք շատ գեներալների անուններ են Ձեզ հայտնի՞, որ նման կոչեր են արել զինվորներին։
–Անձամբ ես չեմ տեսել և չեմ լսել, որ որևէ գեներալ նման հայտարարություն անի։ Բայց տղաները, սպաները, զինվորները, որոնք այնտեղ են եղել, ասում են՝ գեներելաները, սպաները մեզ ասել են, որ հողերը ծախված են, թողեք գնացեք։ Փաստերը պետք է ապացուցվեն, զինվորները պետք է գան, վկայություն տան։ Իսկ այն, որ ես պատերազմի ժամանակ Օմարից 4-5 անգամ վեր եմ կացել, գնացել եմ Ստեփանակերտ իրավիճակին ծանոթանալու, հասկանալու, ես տեսել եմ գեներալների, որոնք Ազգային հերոսներ են, Ստեփանակերտի կենտրոնում են, այդ մարդիկ առաջին գծում չեն եղել, և նրանք շատ-շատ են։
