Հաագայի դատարանում ընթանում է «Հայաստանն ընդդեմ Ադրբեջանի» գործի քննությունը, որից հայկական կողմից ակնկալիքները շատ են:
«Առաջին լրատվական»-ի հետ զրույցում միջազգային իրավունքի մասնագետ, փաստաբան Արա Ղազարյանը նշեց, որ ներկայումս վարույթը չի վերաբերում բուն գործի բովանդակությանը, այլ միայն հրատապ միջոցներ կիրառելուն:
«Ինչքան հնարավոր էր այդ վարույթի շրջանակներում, ներկայացվել է, այս վարույթը չի վերաբերում վեճի առարկային, վերաբերում է միայն հրատապ միջոցների անհրաժեշտությանը, այսինքն բավարար հրատապություն կա, թե ոչ: Խոսքը մասնավորապես, գերիների վերադարձի, նրանց անվտանգության, հայատյաց քարոզչությունը դադարեցնելու, ավարի պուրակը փակելու մասին է:
Այդ շրջանակներում ինչքան հնարավոր է, ներկայացրել ենք, նման վարույթների ժամանակ կողմերը կաշկանդված են ամբողջական պատկերը ներկայացնելու առումով»,-ասաց նա:
Հարցին, թե ինչ ակնկալիքնե՞ր կան մեզ համար, Արա Ղազարյանը պատասխանեց. «Մեր ակնկալիքն է, որ դատարանը բավարարի բոլոր հրատապ միջոցները, թեև բոլորը չեմ կարծում՝ բավարարի: Գոնե ամենակարևորները բավարարի, մասնավորապես, ռազմագերիների կյանքը և առողջությունն ապահովելը, հակաքարոզչությունը դադարեցնելը, ավարի այգին փակելը, մինչև գործով որոշում կկայացվի:
Ամենաշատը գերիների հարցում կարող են մանևրել: Հակաքարոզչության առումով հրապարակային հայտարարությունները գուցե նվազեն: Տեղեկատվություն կա, որ այդ ավարների պուրակը մասամբ փակվել է»:
Նա նկատեց, որ վերջնական որոշումը շուտ չի լինի. «Դա տարիներ կտևի: Դեռ կհասցնենք այդ մասին մտածելու: Իհարկե, գերիների մասով, քանի որ դա հրատապ միջոց է, կարճ ժամանակում որոշում կկայացվի: Խոսքը վերադարձնելու մասին չէ: Մենք իհարկե, վերադարձի հարց ենք բարձրացրել, բայց դա շատ բարձր նշաձող է, բայց նրանց կյանքն ու առողջությունը ապահովելու հարցով որոշում կկայացվի: Համենայնդեպս, դա կարող է զսպել Ադրբեջանին, որ նոր գործեր դատարան չուղարկի: Ընդհակառակը, կարող է քայլեր անել, որ վերջակետ դնի այդ հարցին, որ մենք նրանց համարում ենք ոչ թե գերիներ, այլ հանցագործություն կատարած անձինք»,-ընդգծեց փաստաբանը: