«Առաջին լրատվական»-ի հարցերին պատասխանել է թուրքագետ Հակոբ Չաքրյանը
Թուրքիայի նախկին արտգործնախարար, ապա վարչապետ, «Ապագա» կուսակցության ներկայիս ղեկավար Ահմեդ Դավութօղլուն հայտարարել է, որ Էրդողանը պարտվել է Պուտինի հետ բանակցություններում: 2023-ին Թուրքիայում ընտրություններ են լինելու և արդեն խոսում են Էրդողանի հնարավոր պարտության և հեռանալու մասին: Էրդողանի հեռանալուց հետո Հայաստանն ինչ դիրքերում կհայտնվի, ինչ հեռանկար կունենա:
Դե, հնարավոր է խելքը գլխին մեկը գա իշխանության: Դավութօղլուն իշխանության չի գա, Ժողովրդահանրապետական կուսակցության գլխավորությամբ դաշինքից մեկնումեկը պետք է գա: Դե նրանք Էրդողանի արածների համար ներողություն կխնդրեն, Վաշինգտոնի հետ հարաբերությունները կկարգավորեն և մեզ համար ավելի վատ կլինի:
Դավութօղլուն ասել է, որ եթե Սիրիայում գործերը լավ չեն գնում, նշանակում է, Էրդողանը այն սեղանին, որի շուրջ նստել է Պուտինի հետ, ինչ-որ բաներ տանուլ է տվել: Սիրիայի ռեժիմը առանց Պուտինի կանաչ լույսի տեղից չէր շարժվի: Ինչպե՞ս եք սա գնահատում:
2019 թվականին նրանք Սոչիում համաձայնագիր էին ստորագրել, ըստ որի Էրդողանը պարտավորվել էր Իդլիբի ահաբեկիչներին զինաթափել և հեռացնել այդտեղից: Բայց որ եկավ, 5 կմ լայնությամբ միջանցք սարքեցին Իդլիբի հարավում, համատեղ պարեկություն սահմանեցին, որի մի կողմում ռուսներն էին, մյուս կողմում՝ թուրք զինվորականներն էին: Բայց Թուրքիան ահաբեկիչներին չզինաթափեց, ընդհակառակը՝ սկսեց հովանավորել: Հիմա չգիտեմ՝ ինչ սև կատու է անցել, որովհետև Էրդողանը շատ գոհ էր հանդիպումից, Բայդենից էր գանգատվել Պուտինի մոտ, և նրան քննադատեցին, որ պետության ղեկավարին վայել չէ մեկ ուրիշ պետության ղեկավարից գանգատվել, դրանով քո պետության դիրքերն ես թուլացնում; Հետո ասլան կտրեց Լավրովը, մի քիչ խիստ քննադատեց, որ իրեն Չավուշօղլուն պատասխանել է: Իրականում Չավուշօղլուն ֆիկտիվ ԱԳ նախարար է, այդ գործերը Էրդողանի խոսնակ և գլխավոր խորհրդական Իբրահիմ Քալընն է իրականացնում: Ընդդիմադիր հեռուստաալիքներից մեկում լուրջ վերլուծաբաններ ասացին, որ Քալընը Լոնդոնի գլոբալ շրջանակների հետ շատ սերտ հարաբերությունների մեջ է, և ինքն է իրականում Թուրքիայի ԱԳ նախարարը: Օրինակ, Էրդողան-Բայդեն հանդիպման ժամանակ թարգմանիչ պետք է երկրի ԱԳՆ-ն տրամադրեր, բայց իրականում Էրդողանը որպես թարգմանիչ իր հետ տարել էր իր կուսակցության նախկին անդամներից մեկի դստերը: Ընդ որում, հանդիպումը ոչ սղագրել էին, ոչ էլ արձանագրել: Նույնն էլ եղավ Պուտինի հետ հանդիպմանը: Այսինքն այդ հանդիպման բովանդակության մասին գիտեն Պուտինի, Էրդողանը և Էրդողանի թարգմանիչը: Թուրքիայի ԱԳՆ-ն տեղյակ չէ, թե ինչի մասին են խոսել:
Հակաէրդողանական ուժերը որքա՞ն շանս ունեն հաղթելու 2023-ի ընտրություններում: ԷԹրդողանին քննադատում են կոռումպացված լինելու մեջ:
Դա բոլորն էլ գիտեն, Էրդողանը համարվում է աշխարհի ամենահարուստ առաջնորդը, իսկ Պուտինը՝ ամենահարուստ մարդը, այսինքն հարուստ է նաև գործարարներից: Էրդողանի տղան մի ամբողջ նավատորմ ունի:
Որքան ես հետևում եմ իրադարձություններին, հնարավոր է ժողովուրդը նույնիսկ չսպասի մինչև 2023 թվականը: Ժողովրդի վիճակը շատ ծանր է, օրինակ, օգոստոսին ճարահատյալ վիճակում հայտնված մանր գործարարներից, ուսուցիչներից 29 մարդ ինքնասպան է եղել: Թուրքիայի վիճակը շատ վատ է:
